Asqar Aqaev Qyrǵyzstan parlamentinen eks-prezıdent mártebesin qaıtarýdy surady

<p>ASTANA. KAZINFORM — Qyrǵyzstannyń burynǵy memleket basshysy Asqar Aqaev el parlamentine eks-prezıdent mártebesin qaıtarýdy surap hat joldady.</p>

Jogorký Keneshtiń baspasóz qyzmetiniń habarlaýynsha, atalmysh hat 5 qyrkúıek kúni Qyrǵyz Respýblıkasy Jogorký Keneshiniń Konstıtýtsııalyq zańnama, memlekettik qurylym, sot-quqyqtyq máseleler jáne reglament komıtetine kelip túsken.

Atalǵan komıtet tóraǵasy, depýtat Cholpon Sultanbekova bul másele kún tártibinde birden qaralmaıtynyn atap ótti.

— Bul máseleni qaraý protsedýrasy óte uzaq protsess. Másele bir kúnde sheshilmeıdi. Hat parlamentke keshe tústi, men ony búgin tańerteń ǵana aldym. Suraq saıası. Jogorký Kenesh — alqaly organ. Kún tártibine engizý nemese engizbeý, sondaı-aq qaraý tártibiniń basqa da nıýanstary týraly sheshim birlesip qabyldanady, — dedi depýtat.

Esterińizge sala keteıik, Asqar Aqaev 1990 jyldyń 27 qazany men 2005 jyldyń 11 sáýiri aralyǵynda Qyrǵyzstan prezıdenti boldy.

2005 jylǵy «Qyzǵaldaq tóńkerisinen» keıin ol Reseı Federatsııasyna ketti. Qazir sonda turady jáne ǵylymı qyzmetpen aınalysady.

Budan buryn habarlaǵanymyzdaı, Qyrǵyzstan Bas prokýratýrasy Asqar Aqaevqa qatysty qylmystyq isti toqtatqan.

Oǵan «bılikti nemese qyzmettik babyn asyra paıdalanýǵa qatysy bar», «Kameko» kompanııasymen kelisim jasaý epızodtaryna nemquraılylyq tanytty» degen aıyp taǵylǵan bolatyn.