Asyrap alǵan balasyn jetimder úıine ótkizgen ata-analarǵa aıyppul salynýy múmkin

<p>Asyrap alǵan balasyn jetimder úıine ótkizgen ata-analarǵa aıyppul sanktsııasy engizilýi múmkin. Bul jaıynda Premer-Mınıstrdiń orynbasary Tamara Dúısenovanyń Senat depýtattarynyń saýalyna bergen jaýabynda aıtylǵan, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

«Balany keri qaıtarǵan qabyldaýshy ata-analardyń balalardy óz otbasyna qaıta asyrap alý quqyǵy zańnamamen shektelgen. Sonymen qatar sot sheshimi negizinde burynǵy bala asyrap alýshy ata-analar balany kútip baǵý úshin alıment tóleıdi. Balany qabyldap alýshy burynǵy ata-analarǵa aıyppul sanktsııasyn engizý týraly usynysty muqııat zerdeleýdi, halyqaralyq tájirıbeni taldaýdy jáne qoǵamdyq talqyǵa salýdy eskere otyryp, mınıstrlik (Oqý-aǵartý mınıstrligi) múddeli memlekettik organdardyń, úkimettik emes sektordyń, halyqaralyq sarapshylardan turatyn jumys tobyn qurdy», - dep atap ótedi Úkimet basshysynyń orynbasary jaýabynda. 

Onyń atap ótýinshe, jumys toby burynǵy qabyldap alýshy ata-analardy jaýapkershilikke tartýdyń álemdik tájirıbesin zerttep, jetim jáne ata-ana qamqorlyǵynsyz qalǵan balalarǵa arnalǵan uıymdarǵa balalardyń qaıtarylý sebepterin taldaıtyn bolady.

«Atqarylǵan jumystyń nátıjesi boıynsha qajet bolǵan jaǵdaıda burynǵy balany qabyldap alýshy ata-analarǵa aıyppul sanktsııasyn engizýge qatysty zańnamaǵa tıisti ózgerister men tolyqtyrýlar ázirlenedi. Mınıstrlik jumys toby sheginde búkil usynystardy talqylaýǵa ázir»,- dedi Tamara Dúısenova.