Asyldyń muraty asyl: Óskemendik oqýshy komıks arqyly Alash ardaqtylaryn nasıhattap júr
Bala kúninen sýret salǵandy jaqsy kóretin Asyl Suńǵatqyzy kitapqa da úıir. Qazaqtyń klassık aqyn-jazýshylarynan bólek, sheteldik týyndylardy da oqyp turady.
Osy eki qyryn ushtastyrǵan oqýshy 2 jyl buryn komıks shyǵarýdy qolǵa alǵan.
— Eń áýeli Álıhan Bókeıhan týraly «Alash kósemi» atty komıks albom shyǵardym. Jumysty bastamas buryn Alash qozǵalysy jetekshisiniń ómir jolymen, el úshin etken eńbegimen jan-jaqty tanysyp shyqtym. Álbette, ómirin ultyna arnaǵan tulǵanyń júrip ótken jolyn shaǵyn albom arqyly tolyqtaı jetkizý múmkin emes. Dese de myna tehnologııa damyǵan zamanda oqyrmanǵa qandaı da aqparatty shaǵyndap, sýretpen berý tıimdi dep oıladym, — deıdi Asyl.
Komıks albomda Álıhan Bókeıhannyń ómir jolyna qysqasha sholý jasalǵan. Mátinderi de yqshamdalyp berildi.
Kez kelgen oqyrman az ýaqyttyń ishinde albomdy paraqtap shyǵyp, ult úshin qurban bolǵan Alash ardaqtysynyń ómir jolymen tanysyp shyǵa alady.
— Ekinshi komıksim — «Er Tóstik» ertegisi. Bul ertegi shytyrman oqıǵaǵa toly bolǵandyqtan tańdadym. Odan keıin alashordashylardyń sózderin jasóspirimderge nasıhattaý úshin «stıker pak» jasadym. Bul — japsyrma qaǵaz. Onda qanatty sózder, óleń joldary jazyldy. Jastar «stıker pakty» telefonyna nemese noýtbýgine jabystyryp qoıa alady, — deıdi sýretshi.
Aıta keterligi, oqýshy qyz komıksti qalammen emes, platshet betine grafıkalyq sýret retinde salady. Bul zamanaýı ádisti meńgergen qylqalam sheberleri óte az.
— Bıyl Maǵjan Jumabaevtyń 130 jyldyǵy bolǵandyqtan onyń «Batyr Baıan» poemasy jelisimen sýret sóz albomyn shyǵarýdy uıǵardym. Tusaýkeseri A. S. Pýshkın atyndaǵy Shyǵys Qazaqstan oblystyq kitaphanasynda ótti. Bul týyndyǵa 7 aıǵa jýyq ýaqyt ketti. Ár sýretti asyqpaı salyp, sapaly dúnıe shyǵarǵym keldi. Keıipkerlerdiń kıimin zamanaýı qylyp, ashyq tústerdi tańdadym. Osy oraıda jol nusqap, aqyl aıtyp júretin jetekshim — sýretshi, jýrnalıst Mereı Qaınarulyna alǵysymdy bildiremin, — deıdi Asyl Suńǵatqyzy.
Sh.Ýálıhanov atyndaǵy № 3 mektep-lıtseıiniń 9 «D» synyp oqýshysy alda qaı salaǵa bet buratynyn áli naqty tańdaǵan joq.
Biraq súıikti hobbıine aınalǵan sýret ónerin ómir jolynda serik etkisi keledi.
Keleshektegi maqsattarynyń biri — ınternette balalarǵa arnalǵan qazaq tildi kontent qalyptastyrý.
Sýretteri tek komıkske emes, mýltfılmge de aınalýy múmkin.
Asyldyń synyp jetekshisi Aınur Serikqyzy shákirtin maqtan tutatynyn jetkizdi.
— Asyl — tek bizdiń synyptyń emes, muqym mekteptiń maqtanyshy. Únemi onyń jetistikterine qýanyp, tileýles bolyp otyramyz. Tárbıeli, mádenıetti, oqýda ozat. Oń qolyma aınaldy desem de bolady. Men joq kezde synypqa bas-kóz bolady. Synyptastarynyń bári ony qatty syılaıdy, aıtqanyna qulaq qoıyp tyńdaıdy. Bolashaqta Asyldan elge tanymal myqty azamat shyǵatynyna senemin! , — deıdi ol.