Ashyq: «qyzyl» mártebesi bar 32 aqtóbelik aıyppul tóledi

AQTÓBE. QazAqparat – Aqtóbede 3608 kásipkerlik nysan men mekeme «Ashyq» qosymshasyna engizilgen. «Qyzyl» mártebesi bar 156 adamnyń karantın erejesin saqtamaı, kópshilik jınalatyn orynǵa barǵany anyqtaldy, dep habarlaıdy QazAqparat tilshisi.

Aqtóbede 3,6 myńnan astam kásipkerlik nysan men mekemege «Ashyq» qosymshasy engizilse, onyń 225-i testilik rejımde jumys istep tur. Óńirlik kásipkerler palatasynyń dırektory Sulýpan Shyntasovanyń aıtýynsha, osy aptada «kóshbasshylardyń» tizimi jańartyldy. Sońǵy eki aptanyń ishinde taǵy 32-i qosyldy. Búgingi oblysta barlyǵy «Ashyq» jobasynyń 69 «kóshbasshysy» bar.

Aıta keteıik, Aqtóbe oblysy boıynsha bas memlekettik sanıtar dárigeriniń qaýlysyna sáıkes «Ashyq» jobasynyń qatysýshylary saǵat 22:00-ge deıin, «kóshbasshy» mártebesimen saǵat 00:00-ge deıin jumys isteýge ruqsat etilgen. Ashyq jobasynyń qatysýshylary, aýtsaıderleri men kóshbasshylary týraly aqparat apta saıyn Aqtóbe oblysy ákimdiginiń saıtynda jańartylady.

«Búginde QR-kodty alý júıesi tolyǵymen avtomattandyrylǵan jáne ótinimdi maquldaý týraly habarlama birneshe mınýt ishinde keledi. Barlyq suraqtar boıynsha kásipkerler palatasyna júginýge bolady. Joba engizilgeli beri óńirde «sary» mártebesi bar 181 adam jáne «qyzyl»mártebesi bar 156 adam anyqtaldy. «Qyzyl» mártebesi bar 32 adam ákimshilik jaýapqa tartylyp, 1, 4 mln teńgegeden somada aıyppul salyndy. Búgingi kúni óńirlik kásipkerler palatasy jáne oblystyq sanıtarııalyq-epıdemıologııalyq baqylaý departamentimen birlesip, «Ashyq» jobasyna qatysatyn nysandardyń demalys kúnderi de jumys isteýine ruqsat berý jóninde usynys qaralyp jatyr», - dedi Sulýpan Shyntasova.