Ashyq qosymshasynyń aqparattary arnaıy qyzmetterge berile me

NUR-SULTAN. QazAqparat – Arnaıy qyzmetterdiń Ashyq qosymshasy arqyly azamattardyń qozǵalysyn baqylaýy múmkin be? Ortalyq kommýnıkatsııalar qyzmetinde BAQ ókilderi joba jetekshilerine osyndaı saýal qoıdy, dep habarlaıdy QazAqparat tilshisi.

Bul suraqqa Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov jaýap berdi.

«Joq. Jobanyń tujyrymdamasy bizdiń eshqandaı júıege qosylmaıtynymyzdy, eshqandaı baqylaý sharalaryn kózdemeıtinimizdi naqty aıqyndaǵan. Jalǵyz eskeretin dúnıe – «qyzyl» nemese «sary» tústi mártebe anyqtalǵan kezde biz tıisti bıznes obektisine esep beremiz. Siz suraǵandaı esepke alý nemese baqylaý joq», - dedi vıtse-mınıstr.

Áset Turysov vırýs juqtyrǵandar men baılanysta bolǵan adamdardyń málimetteri tek sanıtarlyq dárigerlerge ǵana ketetinin qaıtalap eskertti.

«Basqa eshqaıda jiberilmeıdi. Óz ókilettikteri aıasynda tek medıtsına mamandary ǵana bul derekterdi kóre alady. Barlyǵy zańǵa sáıkes bolady. Biz, eń aldymen, zańǵa súıenemiz. Zań qaýlydan joǵary, al onda «eshkim jeke derekterdi paıdalana almaıdy» dep aıtylǵan. Derbes derekter sotqa deıingi tergeý, sot sheshimi bolǵan jaǵdaıda ǵana usynylýy múmkin. Bul jerde de zańǵa sáıkes jumys isteımiz. Qaýlyǵa sáıkes, Densaýlyq saqtaý mınıstrliginiń ókilettikterin eskere otyryp, biz derekterdi tek sanıtarlyq dárigerlerge beremiz. Qalǵanynyń bári «Derbes derekter týraly» zańmen retteledi», - dep túsindirdi Áset Turysov.