«Ashyq» bızneske óz qyzmetin jandandyrýǵa múmkindik beredi – Asqar Mamın

NUR-SULTAN. QazAqparat – Sáýir aıynyń qorytyndysy boıynsha vaktsınatsııaǵa jatatyn azamattardyń 20 paıyzy koronavırýsqa qarsy vaktsına alýǵa tıis. Bul týraly Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Qazirgi tańda, epıdemıologııalyq jaǵdaı birshama turaqtaldy. Vırýstyń reprodýktıvtilik ındeksi 1-ge tómendedi. Aýrýhanalardaǵy oryndar – 41 paıyzǵa, reanımatsııalyq bólimderdegi oryndardyń júktelýi – 28 paıyzǵa deıin azaıdy. Sondyqtan, búgingi eń mańyzdy mindet azamattarymyzdy koronavırýsqa qarsy vaktsınatsııamen jappaı qamtý bolyp tabylady»,- dedi Úkimet basshysy.

Onyń atap ótýinshe, sáýir aıynyń qorytyndysy boıynsha vaktsınatsııaǵa jatatyn azamattardyń 20 paıyzy koronavırýsqa qarsy ekpe alýǵa tıis. Vaktsınalaý jospary men óńirlerge vaktsınany jetkizý grafıgin saqtaý kerek. Sondaı-aq maska kııý, qashyqtyqty saqtaý jáne adamdardyń jınalýyna jol bermeý boıynsha talaptardyń qatań saqtalýy mańyzdy.

«Keshegi kúnnen bastap kásipkerlik nysandarynda «Ashyq» qosymshasyn paıdalý bastaldy. Atap aıtqanda, kınoteatrlar men teatrlarda bul joba tıimdi iske asýda. Endi «Ashyq» jobasy aıasynda kafe men meıramhanalar, sonymen qatar kórmeler, saýda ortalyqtary jáne sport obektileri, sonyń ishinde fıtnes zaldary ashylýǵa daıyn. Jalpy, qazirgi jaǵdaıda «Ashyq» qosymshasyn keńinen paıdalaný – bızneske óz qyzmetin jandandyrýǵa múmkindik beredi», - dedi Asqar Mamın.