Ashyq: Aqmola oblysynda aýtsaıder kásipkerler sany 3,4 ese artty

KÓKShETAÝ. QazAqparat - Aqmola oblysynda Ashyq jobasy kóshbasshylarynyń sany 152-den 139-ǵa deıin qysqardy, al aýtsaıderler sany 653-ten 2228-ge deıin (3,4 esege) artty. Bul týraly óńirdiń bas memlekettik sanıtarlyq dárigeri Aınagúl Mýsına málim etti, dep habarlaıdy QazAqparat tilshisi.

Bıylǵy 21 sáýirden bastap Aqmola oblysynda bıznes sýbektilerinde koronavırýs ınfektsııasynyń taralý qaýpin azaıtý maqsatynda Ashyq pılottyq jobasy qolǵa alynǵan bolatyn.

Aınagúl Mýsınanyń aıtýynsha, búgingi tańda Aqmola oblysynda 4968 nysan jobanyń resmı qatysýshysy retinde tirkelip, QR-kod alǵan.

«Aǵymdaǵy jyldyń 17 sáýiri men 4 jeltoqsany aralyǵynda Ashyq talabyn buzǵan 2163 adam anyqtaldy, onyń ishinde «sary» mártebesi bar - 573, «qyzyl» mártebesi bar - 1590. Atalǵan tulǵalar kásipkerlik obektilerine jiberilmedi, úı karantınin saqtaý týraly túsindirý jumystary júrgizildi, sondaı-aq karantındik shekteý sharalaryn saqtaý úshin anyqtalǵan tulǵalardyń turǵylyqty jeri boıynsha aqparat joldandy», - dep bólisti A.Mýsına.

Úı karantınin buzǵany úshin jeke tulǵalarǵa jalpy jáne qysqartylǵan óndiris tártibimen 522 ákimshilik aıyppul salyndy. Aıyppuldardyń jalpy somasy 27,6 mln teńgeden asty.

Óńirdiń bas memlekettik sanıtarlyq dárigeri atap ótkendeı, búgingi tańda joba kóshbasshylarynyń sany 152-den 139-ǵa deıin qysqardy, al aýtsaıderler sany 3,4 esege – 653-ten 2228-ge deıin artty. «Kóshbasshy» mártebesi bar jobanyń 139 qatysýshysynyń ishinde tek 17 qoǵamdyq tamaqtaný obektisi bar.