«Ashylǵan óndiris oryndary nege ómirsheń emes?» - BAQ-qa sholý
***
«Keshe Astanada Elbasy Nursultan Nazarbaev «A» basqarýshylyq korpýsynyń memlekettik qyzmetshilerimen keńes ótkizdi. Keńeste «A» korpýsyna ótkizilgen irikteý qorytyndysy shyǵarylyp, merıtokratııa, ashyqtyq jáne qoǵamǵa eseptilik qaǵıdattary boıynsha memlekettik qyzmetti odan ári jańǵyrtý jóninde tapsyrma berildi», - dep jazady «Egemen Qazaqstan» gazeti juma kúngi nómirindegi «Bizdiń paryzymyz - halyq senimin aqtaý» degen taqyryptaǵy maqalasynda. Basylymnyń jazýyna qaraǵanda, Qazaqstan Prezıdenti búginde memlekettik basqarýda eń taıaý ýaqytta sheshýdi qajet etetin birqatar túıtkilder bar ekenine toqtaldy. «Eń aldymen, bul - halyqqa memlekettik qyzmet kórsetý sapasynyń tómendigi. Qyzmettiń bir túrinen 450 tártip buzýshylyq oryn alyp otyr. Qujat aınalymynyń deńgeıin, týrasyn aıtqanda, bıýrokratııa deýge bolady, 1 qyzmetkerge keletin qujattar sany 500-ge jetip jyǵylady. Ótken jyly qazaqstandyqtar memlekettik organdardyń talaby boıynsha 22 mıllıonnan astam anyqtama tapsyrǵan. Bul qalaı bolǵany? Anyqtama azamattardan da kóp. Bul tipti biz elektrondy qujat aınalymy júıesin, HQKO-lardy jedel damytyp otyrǵannyń ózinde oryn alýda. Bıýrokratızm - bul memlekettik basqarý júıesindegi jumystyń normadan tys bolýynyń saldarynyń biri», - dedi Nursultan Nazarbaev.
«Egemen Qazaqstan» gazetiniń jazýynsha, keshe Úkimet úıinde QR Premer-Mınıstri Serik Ahmetovtiń tóraǵalyǵymen Halyqaralyq mamandandyrylǵan EKSPO-2017 kórmesin daıyndaý men ótkizý boıynsha Memlekettik komıssııanyń kezekti otyrysy boldy. S.Ahmetov nazardy Prezıdenttiń taıaýda Aqordada EKSPO-2017-ni daıyndaý men ótkizý máseleleri boıynsha ótken keńeste aıtqan tapsyrmalaryna aýdardy. «Kórme shyǵynsyz bolýy qajet, barlyq pavılondardyń kórmeden keıingi jumysy ulttyq kompanııalar úshin, tutastaı alǵanda memleket úshin tıimdi bolýy tıis», - dedi S.Ahmetov. Ol sondaı-aq EKSPO-ǵa daıyndyq týraly is-sharalardy jarııalaý boıynsha aqparattyq-ımıdjdik jumystarǵa kreatıvtik tásilderdi qoldaný, tıisti zań jobalaryn merziminde daıyndaý qajettigin atap kórsetti.
***
Úkimettiń ústimizdegi jyldyń 9 aıynda jasalǵan jumys qorytyndysyna arnalǵan jıynda Elbasy N.Nazarbaev Qaraǵandyda «Fermer» ushaǵyn qurastyratyn zaýyttyń bar bolǵany 1 aeroplan shyǵarǵanyn, maqta shıkizaty jetkizilmeýi saldarynan Ońtústik Qazaqstan oblysyndaǵy toqyma fabrıkasynyń jumysy otandyq maqta eksportqa shyǵarylyp jatqanda toqtap turǵanyn tilge tıek etti. Elbasy óndiris qýatyn utymdy ornalastyrý talaptary saqtalmaı otyrǵanyn aıta kelip, Astanada elektrovozdar, al Pavlodarda júk vagondary men jartylaı vagondar shyǵaratyn zaýyttyń ashylǵanyna qaramastan, Qaraǵandyda taǵy bir balama kásiporyn salý josparlanyp otyrǵanyn synap ótti. Rasynda da jyl saıyn iske qosylyp, arada biraz ýaqyt ótken soń jumysyn toqtatyp jatqan kásiporyndar sany kóp-aq. Sol óndiris oshaǵyn iske qosý úshin qanshama qarajat jumsaldy. Demek, sonyń bári jelge ushty degen sóz. Ashylǵan óndiris oryndary nege ómirsheń emes? Onyń aıaǵynan tik turyp, jumys istep ketýine ne kedergi? Mine osy saýaldarǵa «Aıqyn» gazetiniń búgingi sanynda ekonomıka ǵylymdarynyń doktory Rahman Alshanov pen BǴM ekonomıka ınstıtýty Astana fılıalynyń dırektory Jangeldi Shymshyqov jaýap berýge tyrysqan. Máselen, R.Alshanov: «Jalpy, jobalar asyǵys jasalady. «Bul óndiristiń ónimin erteń kim alady? Ol naryqta qanshalyqty suranysqa ıe?» degen máseleler túpkilikti zerttelmeıdi. Jobalardy jasaǵanda shıkilik bar. Qomaqty aqsha alý úshin jobany ótirik jasaı salady», - dese, J.Shymshyqov: «Bizde qazir kózboıaýshylyq basym. Keıbir basshylar joǵarydaǵylarǵa jaǵyný úshin jorta, jalǵan kásiporyndardy iske qosady. Tekserilmegen, bolashaǵy belgisiz, ómirsheńdigi aldyn ala eseptelinbegen jobalar qolǵa alynady. Munyń bári burynnan qordalanǵan, dástúrge enip qalǵan, ádet bolyp ketken kózboıaýshylyqtyń bir kórinisi. Aınalyp kelgende, budan zardap shegetin búkil ekonomıkamyz, elimiz», - deıdi. Maqala «Ashylǵan óndiris oryndary nege ómirsheń emes?» degen taqyryppen berilgen.
Osy basylymda saıasattanýshy Erlan Qarınnyń maqalasy «Nur Otan» óz damýynyń jańa kezeńine aıaq basty» degen taqyryppen berilgen. Maqala avtorynyń paıymynsha, partııalyq alańdaǵy negizgi oıynshylar kezekti saılaýǵa deıin qurylymy men taktıkasynda qandaı da bir ózgerister jasap úlgerý úshin sol ózgeristerge qazirden bastap kirisý qajet ekenin bári jaqsy túsinedi. Onyń ústine, kelesi elektoraldyq naýqan mazmuny, qoldanylatyn quraldary jaǵynan aıtarlyqtaı ózgeshe bolatyny kúmánsiz. «Atap aıtatyn bolsam, egerde saılaýaldy nasıhat jumystarynda buryn teledıdar men gazetterge basty nazar aýdarylsa, qazirgi ýaqytta ınternet tehnologııalary aldyńǵy qatarǵa shyqqany sózsiz, sondaı-aq, ásirese, qazaqtildi sektorda qyzý pikirtalas ornaıtyny da daýsyz. Kelesi elektoraldy tsıkldiń mańyzy erekshe mańyzdy bolary da túsinikti. Óıtkeni bul naýqannyń nátıjesinde, bolashaqtaǵy partııalyq júıeniń ǵana emes, búkil saıası júıeniń keskini aıqyndalatyny da aıqyn. Sondyqtan da dál qazir partııalardyń aldynda jańarý men jańǵyrý máseleleri ótkir kúıinde tur. Sondaı-aq burynǵydaı barlyq oıynshylar «Nur Otanǵa» qarap boı túzep, ıaǵnı bolashaq strategııasyn bılik partııasynyń búgingi qadamdaryna baılanysty oılastyratyn bolady», - dedi ol.