«Ashyq Úkimetke» qoǵam tarapynan da, memorgandar tarapynan da shaǵym kóp - mınıstrlik
«Saladaǵy basym jáne osal tustardy taldaý derekterin negizge ala otyryp, kezek kúttirmeı sheshýdi talap etetin problemalardyń tizimin anyqtadyq. Birinshiden, memlekettik organdardyń qolyndaǵy málimetterdi jınaqtap, saqtaý kezinde aqparattyq ashyqtyq prıntsıpi saqtalmaıdy. Bul prıntsıp búkil aqparat ashyq ári qoljetimdi bolý kerek degendi bildiredi. Oǵan shekteý qoıý úshin naqty negiz bolýy kerek. Onyń ózinde ol shekteý ýaqytsha sıpatta bolýy tıis», - dedi QR Aqparat jáne qoǵamdyq damý mınıstrligi Memleket pen qoǵam kommýnıkatsııalaryn damytý departamentiniń dırektory Bekzat Rahımov.
Mınıstrlik ókili aqparatqa qol jetkizý quqyǵyn buzýshylarǵa zańnamamen qarastyrylǵan jaýapkershilik tym shekteýli ekenin taǵy eske saldy. Mysaly, Aqparatqa qol jetkizý týraly zańda talap buzylsa, jaýapkershilik bar ekenin aıtylǵanymen ımperatıvti normalar bekitilmegen kórinedi. Sonyń saldarynan aqparat ıesi qajetti málimetti ýaqytynda jáne tolyq kólemde bermegeni úshin eshqandaı jaýapkershilik arqalamaıtynyn biledi.
«Úshinshiden, jeke ómirge qol suqpaý quqyǵy men aqparatqa qol jetkizý quqyǵynyń arasyndaǵy teńgerimdi saqtaı bilý qajet. Sondyqtan, jeke málimetterdi qorǵaý talaptary aqparatqa qol jetkizý saıasatynyń qosymsha bóligine aınalyp otyr. Kóptegen elderde aqparattyń qoljetimdiligine jaýapty organdar derekterdi qorǵaý qyzmetin birge atqarady», - degen Bekzat Rahımov halyqtyń aqparatqa qol jetkizý jónindegi quqyqtyq bilimi tómen ekenin atap ótti.
Júrgizilgen áleýmettik zertteýler Qazaqstan qoǵamy óziniń aqparatqa qol jetkizý quqyqtary týraly az biletinin kórsetedi.
«Besinshiden, «Ashyq úkimet» portaldary tehnıkalyq turǵydan eskirgen jáne qoǵamnyń suranysyna jaýap bere almaı otyr. Jumys kezinde paıda bolatyn qatelikterdiń kesirinen portaldyń ashylmaýy, personaldyń ıkemsizdigi memlekettik organdar tarapynan da, qoǵam tarapynan da jıi synǵa ushyraıdy.
Altynshydan, halyqaralyq prıntsıpter men usynymdar aqparatqa qol jetkizý týraly zańnamanyń oryndalýyn baqylap, qadaǵalaıtyn táýelsiz organnyń bolýy kerektigin meńzeıdi. Mundaı organnyń eń mańyzdy qyzmeti shaǵymdardy der kezinde qabyldap, sonyń negizinde mindetti túrde sheshim qabylaý bolýy kerek», - dedi departament dırektory.