«Ashyq úkimet portalyndaǵy» aqparattar halyqqa paıdaly bolýy tıis- ÚEU

NUR-SULTAN. QazAqparat – Elordadaǵy «Astana Hub» alańynda IT-kompanııalar men úkimettik emes uıymdardyń «Ashyq derekter» (https://data.egov.kz/) jáne «Ashyq bıýdjetter» (https://budget.egov.kz/) portaldarymen jumys isteýdegi qajettilikter talqylandy. Oǵan QR Aqparat jáne qoǵamdyq damý, Ulttyq ekonomıka, Qarjy mınıstrlikteriniń jáne Joǵarǵy sottyń, IT-qaýymdastyq pen úkimettik emes uıymdar ókilderi qatysty, dep habarlaıdy QazAqparat.

«Ashyq úkimet» portalyna turǵyndar men bıznes ókilderiniń qyzyǵýshylyǵy artqan. Sondyqtan, portaldarǵa ornalastarylatyn aqparattar qoǵam úshin barynsha qoljetimdi ári paıdaly bolýy tıis.

Mysalǵa, IT-qaýymdastyq jáne úkimettik emes uıymdar atalǵan portaldarda QQS tóleýshilerdiń tizilimi, tóleýshi retinde tirkeý esebinen shyǵarylǵan salyq tóleýshilerdiń tizimi, tirkelgen jeke kásipkerlerdiń tizilimi, jekeshelendirý obektileriniń tizilimi, sot aktileri banki jáne t.b aqparattardyń bolǵanyn qalaıdy.

Memlekettik organdardyń ókilderi jyl sońyna deıin birqatar servısterdi Open API-ge kóshirý (mysaly, jeke kásipkerler men zańdy tulǵalardyń derekteri) jáne jańa derekter jıyntyǵyn (mysaly, dármensiz boryshkerler tizimi, áreketsiz dep tanylǵan salyq tóleýshiler tizimi) ashyq túrde ornalastyrý jónindegi josparlary týraly habardar etti.

Talqylaý qorytyndysy boıynsha «Ashyq bıýdjetter» portalynda ornalastyrýǵa jatatyn aqparat tizbesi boıynsha naqty usynystar ázirleý úshin memlekettik organdar men qoǵamdyq uıymdardyń ókilderimen arnaıy jumys tobyn qurý sheshildi.

Kezdesý sońynda is-sharaǵa qatysýshylar IT-kompanııalar men úkimettik emes uıymdar úshin osy kezdesýdiń mańyzdylyǵyn atap ótti, sondaı-aq osyndaı formatta turaqty negizde dıalogty jalǵastyrý qajettiligi týraly sheshimge keldi.