«Ashyq úkimet» portaldarynyń jumysyna halyqtyń qatysýy tómen - Aıda Balaeva
«Bizdiń mınıstrligimiz ashyqtyq prıntsıpin ustanǵandyqtan, komıssııa otyrysy Facebook jelisinde tikeleı efırde beriledi. Jalpy, búgingi otyrysqa komıssııanyń 18 múshesiniń 16-sy qatysyp otyr. Otyrys barysynda tórt másele qaralady», - dedi mınıstr.
Otyrysta «Ashyq úkimet» portaldaryn tanymal etý jáne damytý jónindegi sharalar týraly aqparat tyńdaldy.
A. Balaevanyń aıtýynsha, bul saladaǵy bastamalardy jetildirý kerek.
«Ózderińiz kórip otyrsyzdar, «Ashyq úkimet» portaldarynyń jumysyna halyqtyń qatysýy tómen, ony moıyndaýymyz qajet. Tek basshylardyń blok-platformalaryna kelip túsken ótinishterdiń sany 27 myńnan 37 myńǵa deıin ósken. Ol da bolsa barlyq basshylarǵa qatysty dep aıta almaımyz. Basty sebep nede? Eń aldymen, osy portaldardyń tehnıkalyq kemshilikteri men zańnamalyq olqylyqtary dep bilemin. Sondyqtan bul qadamdardy jetildirýimiz kerek, qazir jaqsy usynystar túsip jatyr. Qoǵamdyq ınstıtýttar da bizben tyǵyz qatynasta jumys isteýge daıyn. Osy oraıda birinshi kezekte ózimizge tikeleı táýeldi suraqtardy sheshýimiz qajet. Ekinshiden, halyqtyń tsıfrlyq saýattylyǵyn kóterýge barynsha atsalysýymyz kerek. Bul turǵyda jan-jaqty aqparattyq túsindirý jumystaryn jetildirýdiń qajettigi bar dep sanaımyn. Oǵan bizdiń mınıstrlik óz tarapynan atsalysýǵa daıyn», - dedi vedomstvo basshysy.
Budan bólek, jıyn barysynda jeke derekterdi qorǵaý máselesi de talqylandy. Sonymen qatar, otyrysta Qazaqstan Respýblıkasynyń salalyq zańnamasyn onyń aqparatqa qol jetkizý salasyndaǵy talaptarǵa, standarttar men qaǵıdattarǵa sáıkestigi turǵysynan tekserý qorytyndylary qaraldy.
A. Balaeva jasalǵan usynystardy tyńdaı kele, elimizde qoǵamdyq baqylaý týraly zań jobasy daıyndalyp jatqanyn aıtty.
«Aqparat mınıstrligi qoǵamdyq baqylaý týraly zań jobasy boıynsha jumysqa kirisedi. Bul baǵytta Memleket basshysynyń naqty tapsyrmasy boldy. Sondyqtan biz jumys tobyn qurýdamyz, zań jobasyndaǵy tıisti normalardy azamattyq qoǵam ınstıtýttarymen belsendi talqylaıtyn bolamyz. Jalpy, búgingi komıssııa otyrysyna engizilgen barlyq taqyryptar talqylandy. Olar boıynsha tıisti sheshimderdi birlese qabyldaımyz», - dedi mınıstr.
Aıta keteıik, Tsıfrlyq damý, ınnovatsııalar jáne aeroǵarysh ónerkásibi mınıstrligi Aqparattyq qaýipsizdik komıtetiniń tóraǵasy Rýslan Ábdihalyqov jáne Іshki ister mınıstriniń orynbasary Sáken Sársenov jeke derekterdi qorǵaý boıynsha qabyldanyp jatqan sharalar jaıynda baıandady.