Ashyq dıalog: Atyraý oblysynyń ákimi ÚEU-lardyń túıitkilderin tyńdady

ATYRAÝ OBLYSY. QazAqparat - Atyraý oblysynyń ákimi Nurlan Noǵaev úkimettik emes uıym (ÚEU) ókilderimen kezdesti. Úsh saǵatqa sozylǵan sharada memlekettik organdardyń ÚEU-men ózara áreketi máselesi talqylandy, dep habarlaıdy QazAqparat Atyraý oblysy ákimdiginiń baspasóz qyzmetine silteme jasap.

Qazir oblysta 120-dan astam úkimettik emes uıym belsendi jumys isteıdi. Kezdesýde qoǵamdaǵy mańyzdy máselelerdi sheshýge úkimettik emes uıymdardyń áleýetin tartý jaıy sóz boldy. ÚEU ókilderi oblysta azamattyq qoǵam ınstıtýtyn damytý men qoldaý baǵytynda júrgizilgen sharalar týraly baıandady. Qoǵamdyq uıymdardyń ókilderin ekologııa, tsıfrlandyrý, ulttyq qundylyqtardy saqtaý, bilim berýdi damytý máseleleri tolǵandyrdy.

Atyraý oblysynyń ákimi Nurlan Noǵaev azamattyq qoǵam ınstıtýty ókilderiniń aımaqtyń áleýmettik-ekonomıkalyq damýyn jaqsartý jaıly barlyq tilekteri men usynystaryn tyńdady. Ashyq dıalog barysynda ÚEU jumystaryndaǵy problemalar, maqsattar men keleshegi týraly syndarly suqbattasý boldy.
 

Kezdesýdi qorytyndylaǵan aımaq basshysy úkimettik emes uıymdardyń sanynyń kóbeıýimen birge azamattyq belsendilik artyp kele jatqanyn atap aıtty. Bul óz kezeginde oblystyń áleýmettik máseleleriniń sheshilýine oń yqpal etedi. Kezdesýdi uıymdastyrýshylar úkimettik emes uıym ókilderin jaqynda qurylǵan azamattyq ortalyqpen belsendi árekette bolýǵa shaqyrdy. Ortalyqtyń maqsaty - ÚEU men memlekettik organdar arasynda ózara baılanysty uıymdastyrý, atalǵan uıymdardyń jumys sapasyn arttyrý.