«Ashyq bıýdjetter» portalynyń jumysyn halyqqa jetkizýde kemshilik bar - Aıda Balaeva
Aqparatqa qol jetkizý máseleleri jónindegi komıssııanyń otyrysynda QR Qarjy mınıstrliginiń ókili «Ashyq bıýdjetter» portalyn jetildirý boıynsha jumys josparynyń oryndalýy jaıynda esep bergen bolatyn. Osy oraıda mınıstr bul baǵytta úlken jumys atqarylyp jatqanymen kemshilikterdiń de bar ekendigine nazar aýdartty.
«Úlken jumys atqarylyp jatyr. Biraq, ókinishke oraı halyq osyndaı jumys atqarylyp jatqanyn bilmeıdi. Sondyqtan halyqty aqparattanyrý máselesin qolǵa alý kerek. Jalpy qazirgi tańda memlekettiń qarajaty qalaı jumsalyp jatqany jáne onyń tıimdi jaratylýy, ár jobanyń júzege asyrylý barysy barlyq azamatymyzdy mazalaıdy. Osyǵan oraı «Ashyq bıýdjetter« portalynyń bar ekendigin, onda memlekettik organdar qarajattarynyń barlyǵy halyqqa ashyq ekendigin kórsetý kerek. Mundaı aqparattandyrý jumysy júrgizilip jatqan joq. Kópshilik osyndaı úlken portal bar ekenin, barlyq memlekettik organdardyń bir portalǵa jumyldyrylǵanyn bilmeıdi. Bul ózekti máselelerdi biri. Óıtkeni, kóptegen másele halyqtyń túsinbeýinen týyndap jatady», - dedi Aıda Balaeva.
Mınıstr «Ashyq bıýdjetter» portalynyń bar ekenin halyqqa keńinen jetkizý qajettigin basa aıtty.
«Ár memlekettik organnyń qarajatty ıgerýi osy jerde jazylyp tur degen aqparat bolýy kerek. Biz de sizderge óz tarapymyzdan kómekteseıik», - dedi ol Qarjy mınıstriniń ókiline.
Aıta keteıik, Aıda Balaevanyń tóraǵalyǵymen onlaın formatta ótken Aqparatqa qol jetkizý máseleleri jónindegi komıssııanyń otyrysynda múmkindigi shekteýli adamdardyń aqparatqa qol jetkizý máseleleri, memlekettik organdardyń ashyqtyq deńgeıin jyl saıynǵy baǵalaýdyń negizgi qorytyndylary, memlekettik organdardyń ınternet-resýrstarynyń biryńǵaı tuǵyrnamasynyń jumysy, sondaı-aq «Ashyq bıýdjetter» portalyn jetildirý boıynsha jumys josparynyń oryndalýy talqylandy.