Áshimbaev Qyrǵyzstan Jogorký Keneshiniń 85 jyldyǵyna arnalǵan konferentsııaǵa qatysty
TMD elderi Parlamentteri Palatalarynyń basshylary men depýtattary qatysqan is-sharada sóz sóılegen Máýlen Áshimbaev aldymen áriptesterin atalǵan mereıli datamen quttyqtady. Senat Tóraǵasy qazirgi tańda Jogorký Kenesh eldiń damýyna qatysty ózekti máseleler talqylanatyn jáne mańyzdy sheshimder qabyldanatyn jalpyulttyq alań retinde aıryqsha ról atqaryp otyrǵanyn atap ótti.
Sondaı-aq ol óńirde parlamentarızmniń ejelden qalyptasqan dástúrlerine nazar aýdardy. Olardyń negizi quryltaı jáne halyq jınalystary ınstıtýty ekeni anyq. Dál osy júıeler dala demokratııasynyń negizin qalyptastyrýda zor mańyzǵa ıe boldy. Senat Tóraǵasy táýelsizdik alǵannan keıin elderimizdiń údemeli damýy jolynda parlamentarızm ınstıtýtynyń orny erekshe bolǵanyn aıtty.
«Bizdiń elderimiz teńgerimdi saıası júıe qurý jáne damýdyń ózindik úlgisin tabý jolynda túrli kezeńderdi bastan ótkerdi. Qazir TMD elderinde parlamentarızm ınstıtýty qalyptasty dep aıtýǵa tolyq negiz bar. Búginde ol memleket pen qoǵamnyń múddesine saı qyzmet etip keledi. Aldaǵy ýaqytta da Parlamentterimiz ýaqyt talabyna saı únemi damyp, jetilip otyratyny anyq», – dedi Máýlen Áshimbaev.
Palata Spıkeri aımaq elderiniń Parlamentteri arasyndaǵy baılanystyń joǵary deńgeıin tilge tıek etip, parlamentaralyq yntymaqtastyqty odan ári nyǵaıtýdyń áleýeti zor ekenin jetkizdi.
«Qazirgi tańda Táýelsiz Memleketter Dostastyǵy elderiniń Parlamentteri arasyndaǵy yntymaqtastyq joǵary deńgeıde ekenin erekshe atap ótkim keledi. Oǵan bizdiń halyqtarymyzdyń ǵasyrlar boıǵy tarıhı baılanysy men ózara senimge taban tireıtin qarym-qatynasy negiz bolǵany sózsiz. Parlamentterimizdiń qyzmeti ózara baılanysty nyǵaıtýǵa jáne halyqtarymyzdyń ál-aýqatyn arttyrýǵa baǵyttalǵan. Zań shyǵarýshy organdar elderimizdiń saýda-ekonomıkalyq, mádenı-gýmanıtarlyq, qaýipsizdik, ekologııa jáne basqa da salalardaǵy yntymaqtastyǵyna úlken úles qosyp otyr. Sondyqtan parlamentaralyq ózara is qımyl men dıalogty odan ári belsendi damytýdyń mańyzy zor», – dedi Máýlen Áshimbaev.
Sonymen qatar búgin Senat Tóraǵasy TMD elderi Parlamentaralyq Assambleıasy Keńesiniń otyrysyna qatysty. Onda TMD PAA-ǵa múshe memleketter delegatsııalarynyń basshylary Assambleıanyń 56-shy plenarlyq otyrysyna daıyndyq barysyn talqylady.
Aıta keteıik, plenarlyq otyrysta parlamentaralyq yntymaqtastyqty odan ári damytý men nyǵaıtý máselelerin jan-jaqty talqylaý josparlanǵan. Atap aıtqanda, terrorızm men ekstremızmge qarsy qyzmetti quqyqtyq retteýdi, ekonomıkalyq qaýipsizdikti, zııatkerlik menshikti qorǵaýdy jáne basqa da birqatar mańyzdy máseleni jetildirý salasyndaǵy modeldik aktiler qaralady.
Sapar aıasynda Máýlen Áshimbaev Ózbekstan Respýblıkasy Olıı Májilisiniń Tóraǵasy Tanzıla Narbaevamen kezdesti. Suhbat kezinde taraptar parlamentaralyq is-qımyldy arttyrý, mádenı jáne gýmanıtarlyq baılanystardy, sondaı-aq shekara mańyndaǵy yntymaqtastyqty nyǵaıtý máselelerin talqylady.
Odan bólek, Máýlen Áshimbaev Reseı Federaldyq Jınalysy Federatsııasy Keńesiniń Tóraǵasy Valentına Matvıenkomen ekijaqty kezdesý ótkizdi. Onda Qazaqstan Parlamenti Senaty men Reseı Federaldyq Jınalysy Federatsııasynyń Keńesi arasyndaǵy parlamentaralyq yntymaqtastyqty damytý jónindegi Jol kartasyna sáıkes birlesken jumystyń perspektıvalyq baǵyttary sóz boldy.
Qyrǵyzstanǵa eki kúndik sapar barysynda qazaqstandyq delegatsııa qazaq-qyrǵyz jastar forýmyna, TMD Parlamentaralyq Assambleıasynyń 56-shy plenarlyq otyrysyna jáne Shyńǵys Aıtmatovtyń týǵanyna 95 jyl tolýyna arnalǵan konferentsııaǵa qatysýdy josparlap otyr.