AShM: Tasqyn búldirgen qora-qopsyny demeýshiler arqyly qalpyna keltirýge bolady

<p>ASTANA. KAZINFORM &ndash; Aýyl sharýashylyǵy mınıstri Aıdarbek Saparov tasqynnan zardap shekken sharýalardyń qora-qopsysyn qalpyna keltirý máselesi qalaı sheshiletinin aıtty.</p>

«Ótken Úkimet otyrysynda Ónerkásip jáne qurylys mınıstri Qanat Sharlapaev tasqyn búldirgen qor-qopsyny qalpyna keltirýge memleket qarjy bermeıtinin aıtty. Bul ustanymmen size kelisesiz be?» - dep surady jýrnalıst Úkimet otyrysynan keıin ótken brıfıngide. 

Mınıstr qazir birinshi kezekte mal basyn qalpyna keltirý sharýasy turǵanyn aıtty.

«Sý tasqynynan zardap shekken sharýashylyqtary men jeke úı sharýashylyqtarynyń mal sany týraly derekter bar. Al siz búgin qora jaǵyn aıtyp otyrsyz. Bizge ondaı qujattar túsken joq. Al túsetin bolsa, qarastyramyz», - dedi mınıstr.

Aıdarbek Saparov «qarastyrý» degen sóz qora-qopsyny qalpyna keltirýge qarjy bólýge daıynbyz degen sóz emes ekenin aıta ketti.

«Ol úshin bizge qujat túsý kerek. Onyń bárin qazir Qurylys komıteti sheshedi», - dedi vedomstvo basshysy.

Mınıstr Ónerkásip jáne qurylys mınıstrliginiń ustanymy týraly naqty jaýap bere almaıtynyn aıtty.

«Bul jerde qarastyrý kerek. Búgin «kelisemin» nemese «kelispeımin» dep týra jaýap bere almaımyn. Qaı jerde, qandaı qora, qaǵaz-qujattary bar ma? Sonyń bárin daıyndaý kerek. Qujat bar qora dep otyrǵanym resmı tirkelgen, jeriniń qujattary, qoldanysqa berý aktisi bar qorany aıtyp otyrmyn. Sondaı qora bolsa, oǵan bólýge bolady. Ótinish bere alady, komıssııa qaraıdy. Al qujaty joq adamdardy qarastyrý kerek. Muny ákimdiktermen birge arnaıy qor arqyly ma, demeýshiler arqyly ma, jabýǵa múmkindikter bolatyn shyǵar», - dedi Aýyl sharýashylyǵy mınıstri.