AShM: Respýblıkada 708,5 myń tonna azyq-túlik taýarlarynyń qory bar

NUR-SULTAN. QazAqparat – Aýyl sharýashylyǵy vıtse-mınıstri Nurbek Daıyrbekov Qazaqstanda áleýmettik mańyzy bar azyq-túlik boıynsha tapshylyq joqtyǵyn málim etti, dep habarlaıdy QazAqparat tilshisi.

«Koronovırýs indeti elimizdiń azyq-túlik qaýipsizdigi, onyń ishinde halyqty ýaqtyly jáne turaqty azyq-túlikpen qamtamasyz etý – qazirgi kezde eń negizgi máseleniń biri ekenin kórsetip berdi. Qazirgi tańda Aýyl sharýashylyǵy mınıstrligimen quramyna áleýmettik mańyzy bar 32 azyq-túlik taýary boıynsha (qoı eti, shujyq ónimderi, jylqy eti, konserviler (et-ósimdik), qııar, burysh, azyq-túliktik bıdaı, salqyndatylǵan jáne muzdatylǵan balyq, ashana qyzylshasy, shoshqa eti, qyzanaq, sarymsaq, alma) óńirlerge monıtorıng júrgiziledi», - dedi Nurbek Daıyrbekov OKQ-da ótken baspasóz máslıhatynda.

Vıtse-mınıstrdiń aıtýynsha, óńirlerdiń jedel derekterine sáıkes 24 shildede respýblıkada 708,5 myń tonna azyq-túlik taýarlarynyń qory jınaqtalǵan. Onyń ishinde turaqtandyrý qorlarynda 33,1 myń tonna, óndirýshi kásiporyndarda 209,5 myń tonna, qoımalarda 154,6 myń tonna, saýda jelilerinde 311,4 myń tonna azyq-túlik ornalastyrylǵan. Budan basqa 404 mln dana jumyrtqa jáne 2,1 mln tonna azyq-túlik bıdaı saqtalǵan.

«Qolda bar ónim qorlary - tez buzylatyn ónimder boıynsha qorlar bir aptaǵa, basqalary boıynsha birneshe aıǵa deıin quraıtynyn kórsetedi. Azyq-túlik óndirisi toqtatylmaıdy. Qorlar únemi jańartylyp, tolyqtyrylyp otyratynyn atap ótken jón. Sondyqtan olar boıynsha tapshylyq joq», - dedi ol.