AShM Islam qarjylandyrý quraldaryn zerttep, praktıkany jandandyrýǵa nıetti

ASTANA. QazAqparat – Islam qarjylandyrý naryǵyna shyǵý jáne ony zerdeleý otandyq aýyl sharýashylyǵy salasyna qosymsha qarjy kózderin tartýda basymdyqqa ıe. Bul týraly Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Aýyl sharýashylyǵy salasyn qarjy resýrstarymen qamtýda memlekettik qoldaý qajet. Sala áleýetin arttyra túsý úshin tikeleı sheteldik ınvestıtsııalardyń róli zor. Osy oraıda, jeke qarjy aǵyndaryn, otandyq jáne halyqaralyq kapıtal naryǵyn tartyp, jumyldyrý kerek. Búginde Islam qarjylandyrý naryǵyna degen qyzyǵýshylyq tendentsııasy únemi ósip keledi. Bul tek musylman elderi arasynda ǵana emes», - dedi Erbol Qarashókeev Islam azyq-túlik qaýipsizdigi uıymynyń uıymdastyrýymen Syrtqy mınıstrliginde ótken semınarda.

Sondaı-aq, vedomstvo basshysy mınıstrlik Islam azyq-túlik qaýipsizdigi uıymynyń barlyq mańyzdy bastamalaryna qoldaý kórsetýge daıyn ekendigin jetkizdi.

«Qazaqstan úshin Islam qarjylandyrý naryǵyna shyǵý – aýyl sharýashylyǵy salasyna qarjy tartýda qosymsha perspektıva. Osyǵan baılanysty Qazaqstanda Islam qarjylandyrý quraldaryn zertteý jáne praktıkany jandandyrý qajet. Onyń ishinde Sýkýk kapıtalyn tartý jáne ınvestıtsııalyq qyzmetti qarjylandyrý mańyzdy quraly da bar», - deıdi ol.

Buǵan deıin E. Qarashókeev aýyl sharýashylyǵy salasyna tartylatyn ınvestıtsııalar kólemi 3,2 trln teńgege deıin jetetinin aıtqan edi.