AShM halyqtyń jaıylymdyq jerge suranysyn qoldan azaıtyp otyr – Toqaev

NUR-SULTAN. QazAqparat – QR Prezıdenti Qasym-Jomart Toqaev Úkimettiń keńeıtilgen otyrysynda Aýyl sharýashylyǵy mınıstrliginiń kózboıaýshylyqpen aınalysyp otyrǵanyn synǵa aldy, dep habarlaıdy QazAqparat tilshisi.

«Bos jatqan jerlerdi tezirek qaıtaryp alyp, ony aýyl turǵyndaryna berýdi tapsyrǵan bolatynmyn. Qazir halyq úshin aıryqsha mańyzy bar jumys júrip jatyr. Biraq bul jerde de Aýyl sharýashylyǵy mınıstrligi men ákimdikter kózboıaýshylyqqa jol bergen. Mınıstrlik jaıylymdyq jerdiń tapshylyǵy 6,8 mln gektarǵa nemese 32 paıyzǵa azaıdy dep málimet berip otyr», - dedi Prezıdent.

Mınıstrdiń aqparatynsha, bul sharýa qojalyqtarmen memorandýmǵa qol qoıýdyń jáne eldi mekenderdiń aýmaǵyn keńeıtýdiń arqasynda múmkin bolǵan.

«Alaıda Bas prokýratýranyń tekserisi kórsetkendeı, birqatar óńirde jaıylymdyq jerdiń tapshylyǵy áli de azaımaǵan. Aqmola, Atyraý jáne Qostanaı oblystarynda aýyl turǵyndaryna malyn fermerlerdiń jerine jaıýǵa ruqsat beriledi degen jalǵan memorandým jasalǵan. Shyn máninde jaıylym jerdiń tapshylyǵy qaǵaz betinde ǵana azaıdy.

Odan bólek aımaqtar halyqtyń jaıylymǵa degen suranysyn tómendetip kórsete bastaǵan. Úkimet buǵan nege kóz juma qarap otyr? Mundaı áreketter aýyl halqynyń narazylyǵyn órshitpese, kemitpeıdi. Úkimetke jergilikti atqarýshy organdarmen birlesip, osy máseleni túbegeıli sheshýdi tapsyramyn», - dedi Memleket basshysy.