AShM aýyldy jerlerde mıkrokredıt berý qaǵıdalaryn bekitti

<p>Qazaqstan Respýblıkasy Aýyl sharýashylyǵy mınıstrligi aýyldyq eldi mekenderde jáne shaǵyn qalalarda shaǵyn nesıe berý qaǵıdalary bekitti.</p>

Shaǵyn nesıeler ótinish berýshilerge merzimi, tóleý, qaıtarý, qamtamasyz etý jáne maqsatty paıdalaný qaǵıdattaryn saqtaı otyryp, mynadaı sharttarda beriledi:

1) shaǵyn nesıe berý merzimi – 5 (bes) jylǵa deıin, mal sharýashylyǵy jobalaryna shaǵyn nesıe berý merzimi – 7 (jeti) jylǵa deıin;

2) shaǵyn nesıeniń eń joǵary mólsheri 2 500 (eki myń bes júz) aılyq eseptik kórsetkishke deıin, aýyl sharýashylyǵy kooperatıvterin damytý úshin – 8 000 (segiz myń) aılyq eseptik kórsetkishke deıin.

Buryn alynǵan shaǵyn nesıe boıynsha mindettemelerdi tolyq oryndaǵan úmitkerlerdi qaıta nesıeleý kezinde shaǵyn nesıeniń eń joǵary somasynyń mólsheri 8 000 (segiz myń) aılyq eseptik kórsetkishke deıin ulǵaıady. Bul rette, shaǵyn nesıe baǵdarlama úmitkerleriniń qaıtarylǵan qarajaty esebinen beriledi, biraq shaǵyn nesıeniń eń joǵary merziminiń 1/2 (bir ekinshi) bóliginen erte emes;

3) nomınaldy syıaqy mólsherlemesi-jyldyq 2,5%-dan (eki bútin onnan bes) aspaıdy;

4) kepilmen qamtamasyz etýdiń bolýy;

5) negizgi borysh pen syıaqyny óteý jónindegi jeńildikti kezeń shaǵyn nesıeleý merzimi uzaqtyǵynyń 1/3 (úshten birinen) aspaıtyn merzimin quraıdy;

6) shaǵyn nesıe berýge maquldaý alǵannan keıin Qazaqstan Respýblıkasynyń salyq zańnamasyna sáıkes salyq organdarynda dara kásipker retinde tirkelý;

Eldi mekenderdiń (ákimshilik baǵynystylyǵyna qaramastan) jáne shaǵyn qalalardyń jeke jáne zańdy tulǵalary aýyl halqynyń kiristerin arttyrý jobasyn iske asyrý sheńberinde shaǵyn nesıeler alýǵa ótinish berýshilerge myna azamattar jatady:

1) jumyssyzdar;

2) dara kásipker retinde memlekettik tirkeýsiz kiris alý maqsatynda taýarlardy óndirý (ótkizý), jumystardy oryndaý jáne qyzmetter kórsetý jónindegi qyzmetti derbes júzege asyratyn tulǵalar jáne (nemese) áreketsiz dara kásipkerler;

3) otbasylyq kásipkerlikte aqy tólenbeıtin qyzmetti júzege asyratyn tulǵalar;

4) satý (aıyrbastaý) úshin jeke qosalqy sharýashylyqta ónim óndirý jónindegi qyzmetti óz betinshe júzege asyratyn, tabysy eń tómengi kúnkóris deńgeıinen tómen tulǵalar;

5) «Aýyl sharýashylyǵy kooperatıvteri týraly» Qazaqstan Respýblıkasynyń Zańyna sáıkes qyzmetin júzege asyratyn aýyl sharýashylyǵy kooperatıvteri;

6) isin jańa bastaǵan jáne jumys istep turǵan dara kásipkerler.

«Aýyl Amanaty» baǵdarlamasyn iske asyrýǵa 2024 jyly respýblıkalyq bıýdjetten 100 mlrd teńge somasynda qarajat bólindi, ol 16 myńnan astam shaǵyn nesıe berýge baǵyttalady. Bul 17 myńnan astam jańa jumys ornyn qurýǵa múmkindik beredi.