Ashhabadta TMD shekarashylary bas qosty
Májiliske 9 memlekettik shekara vedomstvosynyń basshylary, sondaı-aq Dostastyqtyń ózara yntymaqtastyq organdarynyń ókilderi qatysty.
Májilis barysynda TMD elderiniń Ortalyq Azııadaǵy shekarasynyń qorǵalý barysy, qordalanǵan máseleleri talqylandy. Májiliske qatysýshylardyń barlyǵy biraýyzdan Aýǵanstan Islam Respýblıkasyndaǵy qoǵamdyq-saıası jaǵdaıdyń ýshyǵyp turǵandyǵyn, soǵan baılanysty Tájikstan, Túrkmenstan jáne Ózbekstan elderiniń shekara qaýipsizdigine qaýip-qaterdiń artyp turǵandyǵyn atap ótti.
Shekaralyq jaǵdaıdy saraptaı kele qatysýshylar syn saǵatta bir-birine kórsetiler kómektiń mán-jaıyn talqylap, sondaı-aq TMD syrtqy ister mınıstrler keńesiniń 2007 jylǵy 5 qazandaǵy memleketaralyq hattamasyn iske asyrý týraly jospardyń oryndalýy jónindegi málimetti bekitti. Sonymen qatar syrtqy shekarada qıyn sátte kómekke keletin bólimshelerdi daıyndaýdyń baǵdarlamasy bekitildi.
Birlesken túrde ótkiziletin arnaıy shekara is-sharalarynyń daıyndyǵy qaralyp, 2017 jylǵa arnalǵan jospary bekitildi. Ǵylymı-zetterý máseleleri, Shekara áskerleri qolbasshylarynyń májilisteriniń aralyǵynda ótkizilgen is-sharalar da nazardan tys qalmady.
Shekara áskerleriniń qolbasshylar keńesi 77 májilisti 2017 jyldyń ekinshi toqsanynda Almaty qalasynda ótkizý týraly usynys berdi. Sebebi, osy ýaqytta QR UQK Shekara akademııasynyń 85 jyldyǵy atalyp ótetindigi eskerildi.
Májilisti qorytyndylaı kele Shekara áskerleri qolbasshylary keńesiniń 75 májilisi shekarany shegendeýge arnalǵan kezekti qadam bolǵandyǵyn sonymen qatar týrkmendik áriptesterine qonaqjaılyqtary úshin ózderiniń alǵystaryn bildirdi.