Ashhabadta Ortalyq Azııaǵa qatysty jobanyń 3-shi fazasy iske qosyldy

ASTANA. QazAqparat - Ashhabadta 30 sáýir kúni «BUU-nyń Ortalyq Azııadaǵy jahandyq kontrterrorıstik strategııasyn júzege asyrý jolynda» atty joǵary deńgeıdegi otyrys ótkizildi. Sondaı-aq, otyrys aıasynda Ortalyq Azııa úshin birlesken is-qımyl josparyn qoldaý jobasynyń 3-shi fazasy iske qosyldy, dep habarlaıdy QazAqparat tilshisi.

Túrikmenstannyń Qazaqstandaǵy elshiligi taratqan habarlamaǵa qaraǵanda, atalǵan is-shara Túrikmenstan Syrtqy ister mınıstrligi men BUU-nyń Ortalyq Azııa úshin eskertpeli dıplomatııasynyń Aımaqtyq ortalyǵymen (OAEDAO)  uıymdastyryldy. Otyrysqa BUU Bas hatshysynyń orynbasary, BUU Kontrterrorıstik basqarmasynyń basshysy Vladımır Voronkov, Ortalyq Azııa úshin eskertpeli dıplomatııanyń Aımaqtyq ortalyǵynyń basshylary Natalıa German, Ortalyq Azııa elderiniń syrtqy ister mınıstrleriniń orynbasarlary, sonymen birge BUU aımaqtyq qurylymdarynyń ókilderi qatysty.

Belgili bolyp otyrǵandaı, jobanyń birinshi jáne ekinshi fazasy 2010-2017 jyldary júzege asyrylyp, onyń taqyryby Jahandyq strategııanyń negizgi tórt baǵytyna arnalǵan bolatyn.

Aldaǵy ýaqytta OAEDAO men BUUKTB-nyń birlesken aımaqtyq jańa kontrterrorıstik bastamalary «BUU-nyń Ortalyq Azııadaǵy Jahandyq Kontrterrorıstik Strategııasyn júzege asyrý jolynda» taqyrybyna arnalmaq. Atalǵan qadam Ortalyq Azııada strategııalyq turǵyda terrorızmge jáne zorlyq-zombylyq sıpattaǵy ekstremızmge qarys kúres salasyndaǵy Ortalyq Azııa elderiniń áleýetin arttyrýǵa baǵyttalady.

Otyrysta sóz sóılegen V.Voronkovtyń aıtýynsha, jobanyń negizgi baǵyttaryna maqsatty túrde terrorızmge jáne zorlyq-zombylyq sıpattaǵy ekstremızmge qarys kúres boıynsha aımaqtyq jáne ulttyq strategııalarǵa qoldaý kórsetiletin bolady.

Sonymen birge, sóz alǵan Túrikmenstan syrtqy ister mınıstriniń orynbasary S.G.Berdymýhamedov BUU Kontrterrorıstik strategııasynyń Ashhabad is-qımyl josparyn júzege asyrý boıynsha Túrikmenstan BUUKTB-men ary qaraı yntymaqtastyqty ustanýǵa usynys bildirýge daıyn ekenin málimdedi. Atalǵan kontekstte túrikmenstandyq tarap OAEDAO-ny qoldana otyryp, naqty usynystarmen shyǵyp otyr.

Óz kezeginde N.German aımaqtyq jáne eskertpeli dıplomatııa salasyndaǵy óziniń mandatyna sáıkes, OAEDAO atalǵan bastamany birlese júzege asyratynyn atap ótti.

Forýmnyń sońynda «BUU-nyń Ortalyq Azııadaǵy Jahandyq Kontrterrorıstik Strategııasyn júzege asyrý jolynda» joǵary deńgeıdegi otyrystyń qorytyndysy boıynsha Málimdeme qabyldandy.