Ashhabadta bas júldeni jeńip alǵan jeńil atletter elge oraldy

ASTANA. QazAqparat - Ashhabad qalasynda ótip jatqan jabyq keshendegi Azııa oıyndarynda jeńil atletıkadan el qorjynyna 10 medal salǵan sportshylar elge oraldy, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.

Ashhabad-Almaty áýejaıy boıynsha elge oralǵan sportshylardy QR Jeńil atletıka federatsııasy men Almaty qalalyq jeńil atletıka federatsııasynyń qyzmetkerleri kútip aldy.

Delegatsııa quramynda 14 jeńil atlet jáne bas bapker Grıgorıı Egorov pen QR Jeńil atletıka federatsııasynyń sporttyq dırektory Aleksandr Koşeev bar.

Esterińizge sala keteıik, Ashhabadta  Olımpıada chempıony Olga Rypakova uzyndyqqa jáne úsh qarǵyp sekirýden top jardy. Sondaı-aq altyn alǵandardyń qatarynda Ivan Ivanov (ıadro serpý), Sergeı Grıgorev (syryqpen sekirý), Vıktorııa Zıabkına (60 metrge júgirý), Elına Mıhına (400 metrge júgirý) bar.

Jalǵyz kúmis medal úsh qarǵyp sekirýshi Marııa Ovchınnıkovanyń enshisinde.

Qola júldege Olga Safronova (60 metrge júgirý), Anastasııa Vınogradova (60 tosqaýyldar arqyly júgirý), Mıhaıl Lıtvın ( 400 metrge júgirý) ıe boldy.

Qazaqstandyq jeńil atletter jalpy komandalyq esepte ózge elderden ozyq óner kórsetip, birinshi oryndy enshilegen edi. Ekinshi orynda - Úndistan atletteri bolsa, úzdik úshtikti Saýd Arabııasy qorytyndylady.