Ashhabad-2017: Qazaqstandyq jeńil atletter eki kúnde 10 medal jeńip aldy
QR Jeńil atletıka federatsııasynyń baspasóz qyzmeti habarlaýynsha, jarystyń ekinshi kúninde áıelder arasynda úsh qarǵyp sekirýden Qazaqstan namysyn 2012 jylǵy Olımpıada chempıony Olga Rypakova men 2017 jylǵy Azııa chempıony Marııa Ovchınnıkova qorǵady. Rypakova óz kezeginde 14, 32 metrge sekirip jeńiske jetti. Ovchınnıkovanyń kórsetkishi - 13,21 metr boldy. Qola júldege 18 jasqa deıingi jastar arasyndaǵy álem chempıonatynyń jeńimpazy qytaılyq Tan Kıchjao ıe boldy.
Osylaısha, Olga Rypakova Ashhabadta ótip jatqan Azııa oıyndaryn eki altynmen aıaqtady. Ol 18 qyrkúıek kúni uzyndyqqa sekirýden de eshkimge des bermegen edi.
Shyǵys Qazaqstan oblysynyń taǵy bir týmasy Elına Mıhına 400 metrge júgirýden top jaryp, Qazaqstan quramasynyń osy jarystaǵy besinshi altynyn enshiledi.
Mıhına fınaldyq kezeńdi 53, 37 sekýndta júgirip ótti. Kúmis júldege vetnamdyq Thı Hang Ngýen qol jetkizdi. Onyń ýaqyt kórsetkishi - 54, 41 sekýnd.Úzdik úshtikte Taılandtan kelgen Atchıma Eng-Chýan (54, 45 s) bar.
- Maǵan qoldaý bildirgen jandardyń barlyǵyna alǵys bildiremin. Ashhabadta chempıon ataný úshin qolymnan kelgenniń bárin jasadym. Qýanyshyma oraı, altyn medalǵa ıe boldym. Meniń osy jetistigime eńbek sińirgen jeke bapkerim Lıýbov Nıkıtenkoǵa qandaı maqtaý aıtsa da jarasady. Naǵyz óz isiniń mamany. Sol kisige erekshe rahmetimdi aıtqym keledi. Endi komandalyq estafeta bar. El mereıin ósirip, taǵy bir medal jeńip alýǵa tyrysamyz, - deıdi jarystan keıin Elına Mıhına.
19 qyrkúıek jeńiske jetkenderdiń qatarynda 60 metrge júgirgen Vıktorııa Zıabkına da bar. Ol Azııadaǵy eń úzdik sprınter ekenin taǵy bir márte dáleldedi. Jartylaı fınalda ekinshi bolǵanymen, fınaldyq kezeńde ózine básekeles joq ekenin baıqatty. Zıabkına bul qashyqtyqty 7,32 sekýndta júgirip ótti. Ekinshi orynǵa vetnamdyq Le Tý Chın (7,36 s) turaqtasa, qola júlde taǵy bir qazaqstandyq atlet Olga Safronovaǵa buıyrdy. Sońǵysy jartylaı fınalda segizinshi orynda qalyp qoıǵan edi. Biraq fınalda Safronova bar kúshin salyp, Qazaqstan qorjynyna taǵy bir júldeni syılady. Odan bólek qola júldege erler arasynda 400 metrge júgirgen Mıhaıl Lıtvınde ıe boldy. Fınalda Lıtvın osy týrnırdegi eń úzdik nátıjesin kórsetti - 46,51 sekýnd.
Ashhabadtaǵy Azııa oıyndarynyń alǵashqy eki jarys kúniniń qorytyndysy boıynsha Qazaqstan jeńil atletteri 10 medalmen (6 altyn,1kúmis, 3 qola) jalpy komandalyq esepte birinshi orynda tur.
Aıta keteıik, jarystyń alǵashqy kúninde Ivan Ivanov (ıadro serpý),Olga Rypakova (uzyndyqqa sekirý), Sergeı Grıgorev (syryqpen sekirý) chempıon atanǵan bolatyn. Al 60 metrge tosqaýyldar arqyly júgirgen Anastasııa Vınogrodova qola medal enshiledi.
Esterińizge sala keteıik, osyǵan deıin Qazaqstan quramasy jalpy esepte 6 altyn, 6 kúmis, 10 qola medalmen úshinshi orynǵa kóterilgenin habarlaǵan bolatynbyz. Al kósh basynda 43 altyn, 28 kúmis, 18 qola medal jeńip alǵan túrikmen sportshylary kele jatsa, 7 altyn, 4 kúmis, 15 qola medal enshilegen Iran sportshylary ekinshi orynda keledi.