Ashat Shaharov: Áleýmettik mańyzy bar jobalardyń paıdalanýǵa berilýin qamtamasyz etý kerek

<p>Aqtóbede 2023-2025 jyldarǵa arnalǵan bıýdjetke ózgerister engizip, 14,4 mlrd teńgeni qaıta bóldi. Oblys ákimi áleýmettik mańyzy bar jobalardyń paıdalanýǵa berilýin qamtamasyz etý kezinde qoǵamdyq baqylaýdyń mańyzy zor ekenin aıtty, dep habarlaıdy<a href="https://kaz.inform.kz/" target="_blank" rel="noopener"> Kazinform</a>.</p>

Aqtóbe oblysy boıynsha óte mańyzdy sheshimder qabyldandy. Bul tek áleýmettik salalardy qoldaýǵa ǵana emes, kásipkerlikti damytý, aýyl sharýashylyǵyn ótkendetýge negizdeldi. 2023-2025 jyldarǵa arnalǵan bıýdjetke ózgertýler men tolyqtyrýlar engizilgen kezde qurylysy toqtap qalǵan ǵımarattardy qoldanysqa berý týraly sheshim quptaldy.

- Aqtóbe oblystyq qurylys basqarmasyna 929,5 mln teńge qarastyryldy. Qarǵaly aýdany Badamsha aýylyndaǵy 150 oryndyq Óner mektebiniń qurylysyn jalǵastyryp, Qarǵaly turǵyn alabyndaǵy basseıni bar dene shynyqtyrý-saýyqtyrý kesheniniń qurylysy júrgiziledi. Sonymen birge Alǵa aýdany Marjanbulaq aýyly Shyǵys turǵyn alabyndaǵy 300 oryndyq mekteptiń qurylys jobasyn túzetýge jáne mekteptiń syrtqy jelilerin salýǵa qarjy baǵyttalyp otyr. Aqtóbe qalasynyń bas josparyn túzetýge 50,9 mln teńge qarastyrylyp otyr. Osy salada Yrǵyz aýdany Aqshı, Qurylys, Qutıkól, Sheńbertal aýyldaryndaǵy orta mektepterdi gazdandyrý jáne Aqtóbe qalasynda 300 oryndyq erekshe balalarǵa arnalǵan arnaıy balabaqsha qurylysy úshin 8,1 mln teńge bólindi»,- dedi Aqtóbe oblystyq ekonomıka jáne bıýdjetti josparlaý basqarmasynyń basshysy Nurjan Maqsatov.

Aqtóbelik sharýalardyń da jaǵdaıy nazardan tys qalmady. Oblys ákimi Ashat Shaharov aýdandarǵa sapary kezinde dıqandarmen, sonymen birge mal baǵyp, ónim kólemin arttyryp otyrǵan sharýalarmen kezdesip, olardyń jaǵdaıyn surady. Sol kezde kóbi sýbsıdııa jaıyn qozǵady.

Foto: Aqtóbe oblysy ákiminiń baspasóz qyzmeti.

- Aýyl sharýashylyǵy salasyna 4,7 mlrd teńge baǵyttalyp otyr. Aýyl sharýashylyǵy sýbektilerin qoldaý úshin jemshóp shyǵyndarynyń qunyn sýbsıdııalaýǵa 2,9 mlrd teńge bólindi. Sonymen birge baǵany turaqtandyrý sheńberinde birinshi surypty undy forvardtyq satyp alýǵa 1,5 mlrd teńge, aramshópter jáne zııandy organızmdermen kúresý úshin pestıtsıdterdiń qunyn sýbsıdııalaýǵa 250 mln teńge berildi»,- dedi Aqtóbe oblystyq ekonomıka jáne bıýdjetti josparlaý basqarmasynyń basshysy Nurjan Maqsatov.

Otyrysqa qatysqan Aqtóbe oblysynyń ákimi Ashat Shaharov bıýdjetti naqtylaý aıasynda qaralǵan barlyq joba óńirdiń áleýmettik-ekonomıkalyq damýyna jáne áleýmettik máselelerdi sheshýge baǵyttalǵanyn alǵa tartty.

- Aýdandardy araladym, qalany da qarap shyqtym. Kóp qurylys aıaqtalmaı tur. Áleýmettik mańyzy bar jobalardyń paıdalanýǵa berilýin qamtamasyz etý kerek. Keıde sapasyz bolyp jatyr. Qoǵamdyq baqylaý bolǵany durys. Bitken iske qýanǵannan góri, qalaı atqarylǵanyn nazarǵa alý kerek. Zań ortaq, sondyqtan belsendilik tanytyp, jumys isteýimiz kerek. Ári qaraı sozýdyń qajeti joq. Sebebi halyqtyń senimin joǵaltyp alamyz, - dedi Aqtóbe oblysynyń ákimi Ashat Shaharov.

Foto: Aqtóbe oblysy ákiminiń baspasóz qyzmeti.

Onyń aıtýynsha, serpilis jasap, jol jóndeýge de basymdyq berý kerek.

Aıta keteıik, bıyl Aqtóbe oblysynda jergilikti mańyzy bar 872,8 shaqyrym avtojoldy jóndeýge jáne salýǵa 53,6 mlrd teńge bólindi. Nátıjesinde jaqsy jáne qanaǵattanarlyq jaǵdaıdaǵy joldardyń úlesi 78% quraıdy. Sonymen qatar, oblystyq jáne aýdandyq mańyzy bar avtojoldardy kútip ustaýǵa 258 birlik mamandandyrylǵan tehnıkasy bar 50 kásiporyn jumyldyryldy.