Ashat Oralov Almatyda zardap shekken bıznes ókilderimen kezdesti

ALMATY. QazAqparat - «AMANAT» partııasynyń Atqarýshy hatshysy Ashat Oralov Almatyǵa jumys saparynyń ekinshi kúni qańtar aıyndaǵy oqıǵalar kezinde zardap shekken shaǵyn jáne orta bıznes ókilderimen kezdesti. Sondaı-aq partııanyń jastar qanatynyń belsendilerimen aldaǵy jumys basymdyqtaryn talqylady, dep habarlaıdy QazAqparat.

Kezdesý barysynda almatylyq kásipkerler Ashat Oralovqa nysandardy qalpyna keltirý jaǵdaıy jáne qazirgi tańda oryn alyp otyrǵan túıindi máseleler týraly aıtty.

«Partııa Tóraǵasy, Prezıdent Qasym-Jomart Toqaevtyń tapsyrmasy boıynsha nysandardy qalpyna keltirý jáne zardap shekken kásipkerlerge keltirilgen zalaldy óteý boıynsha sharalar qabyldanýda. Jergilikti bıliktiń málimeti boıynsha, Almatyda 1 myńnan astam kásipker 3,7 mlrd teńge somasynda tólem aldy. Olardyń ishinde saýda, qoǵamdyq tamaqtaný, logıstıka, BAQ jáne basqa da salalardyń sýbektileri bar. 10 naýryzǵa deıin taǵy 200-den astam ótinishti qaraý josparlanýda, osylaısha ótinishterdiń 90% qanaǵattandyrylady», - dedi Ashat Oralov kezdesý qorytyndysynda.

Onyń aıtýynsha, qazirgi tańda elimizde halyqtyń 40% jýyǵyna jumys berip otyrǵan 1,4 mıllıonnan astam kásipker bar. Almaty qalasynyń ózinde 200 myńnan astam ShOB sýbektisi jumys isteıdi. Sondyqtan kásipkerlikti damytý men qoldaý máseleleri árqashan «AMANAT» partııasynyń basymdyǵy bolyp qala beredi.

Osy kúni Ashat Oralov partııa jastar qanatynyń belsendilerimen de kezdesti.

«Partııany transformatsııalaý júrip jatqan kezeńinde «Jas Otan» jergilikti jerlerdegi jastardyń problemalaryn sheshýge baǵytalǵan jumysty burynǵydan da kúsheıtip, ony kún tártibinen túsirmeýi tıis. Qazirgi ýaqytta partııa jastardyń, onyń ishinde NEET sanatyndaǵy jas býynnyń túıindi máselelerin anyqtaý boıynsha keshendi taldaý júrgizýde. Osy jumystyń qorytyndysy boıynsha jańa jastar baǵdarlamasy ázirlenip, ol «Jas Otan» forýmynda qabyldanady», - dep túıindedi Ashat Oralov.