Ashat Aımaǵambetov túlekterge ýnıversıtet tańdaýda keńes berdi

NUR-SULTAN. QazAqparat – Bıyl mektep bitiretin oqýshylarǵa hat jazǵan QR Bilim jáne ǵylym mınıstri Ashat Aımaǵambetov olarǵa ýnıversıtet tańdaýda qaperde ustaıtyn birqatar keńes berdi, dep habarlaıdy QazAqparat tilshisi.

«Qadirli dostar! «Qandaı ýnıversıtetti tańdap, qaıda oqyǵan durys?» dep te oılap júrgen bolarsyzdar? Osy rette birneshe keńes berýdi jón sanap otyrmyn. Birinshi. JOO-nyń jumys berýshiler reıtıngindegi ornymen, kadr quramymen, oqý jaǵdaılarymen tanysyńyz. Ekinshi. Qandaı baǵdarlama boıynsha oqý júrgiziletinin qarańyz. Sondaı-aq mamandyqtardyń ataýy birdeı estilip, biraq mazmuny aıtarlyqtaı ózgeshe bolýy múmkin. Sol sebepti úzdik álemdik tájirıbege súıene otyryp, ýnıversıtetterdiń barlyq baǵdarlamasynyń tizilimin jasadyq. Endi ol bárine qoljetimdi. Úshinshi. Ýnıversıtettiń bedelin baǵalańyz. Qazir JOO-lar óz úlgisindegi dıplomdardy beredi. Degenmen ýnıversıtet beretin dıplomnyń qaǵazynan buryn, onyń qandaı mamandy daıyndap shyǵaratyny mańyzǵa ıe», - dep jazdy mınıstr Facebook paraqshasynda.

Tórtinshiden, mınıstr ýnıversıtettiń akkredıtatsııasyna nazar aýdarýǵa keńes beredi. Onyń atap ótýinshe, eger ol eń myqty akkredıtteý uıymdarynan ótse, onda sapanyń bolatynyna senýge bolady.

«Besinshi. Ýnıversıtetti tańdaý kezinde sizdi kúmándi arzan oqý nemese sabaqqa qatyspaý múmkindigi sııaqty oılar qyzyqtyrmaýy mańyzdy. Sebebi jumys berýshiler dıplomdy jaramsyz dep tanyp, qarajatyńyz ben ýaqytyńyz bosqa shyǵyn bolýy múmkin. Altynshy. Qazaqstandyq JOO-ny tańdaýǵa keńes beremin. Bizdiń ýnıversıtetterdiń sapasy kórshi elderdiń kóptegen ýnıversıtetinen asyp túsetinin senimmen aıta alamyn», - dedi Ashat Aımaǵambetov.