Ashat Aımaǵambetov sheteldik pedagogterdi jumysqa qabyldaý tártibin túsindirdi

ASTANA. QazAqparat – Ortalyq kommýnıkatsııalar qyzmetinde ótken brıfıngide Oqý-aǵartý mınıstri Ashat Aımaǵambetov sheteldik pedagogterdi jumysqa qabyldaý tártibi qalaı júrgiziletinin túsindirdi, dep habarlaıdy QazAqparat tilshisi.

Brıfıngide BAQ ókilderi mınıstrge Reseı, Ýkraına jáne basqa elderden kelgen mıgranttardyń balalaryn mektepter men balabaqshalarǵa ornalastyrýǵa qatysty suraq qoıdy.

«Bizde memlekettik qyzmet kórsetýdiń standarty, belgilengen rásimder bar. Biz búgingi kúni úlken ózgeristerdi baıqap otyrǵan joqpyz. Barlyǵy shtattyq rejımde jumys istep jatyr. Sondyqtan eshqandaı ózgeris joq. Buǵan deıin ár túrli jaǵdaılar bolǵanyn bilesizder. Qazirgi ýaqytta da qandaı da bir ózgerister baıqalǵan joq», - dedi Ashat Aımaǵambetov suraqqa jaýap bere otyryp.

Vedomstvo basshysy mıgranttardyń balalaryn mektepter men balabaqshalarǵa qabyldaý tártibi barlyq qazaqstandyqtarmen birdeı ekenin túsindirdi. Bul talap ýaqytsha turýǵa ruqsat alǵan mıgranttar men ýaqytsha keletin sheteldikterdiń balalaryna ortaq.

Sondaı-aq, mınıstr qazaqstandyq bilim berý uıymdaryna basqa elderden pedagogterdi qabyldaý úshin qoıylatyn talaptar týraly aıtty. Pedagogterdi jumysqa qabyldaý kezinde úmitkerler Ulttyq biliktilik testinen ótýi tıis. Bul test eki bólimnen turady: pándik jáne oqytý ádistemesi. Qazaqstanda pánderdi oqytýda, ádisnamada jáne pánderdiń mazmunynda mańyzdy erekshelikter bar. Tıisinshe, úmitkerler osy talaptarǵa saı bolýy kerek.

Buǵan qosa, brıfıngi barysynda Ashat Aımaǵambetov balabaqsha tárbıeshilerine jalaqy tóleýdiń jańa júıesi engiziletinin málim etti.

Onyń aıtýynsha, mundaı mehanızm qazirgi tańda birneshe balabaqshada synaqtan ótip jatyr.