Ashat Aımaǵambetov shaǵyn jınaqty mektepter problemasyn atady

NUR-SULTAN. QazAqparat – Shaǵyn jınaqty mektepterdiń muǵalimderine jalaqy tóleý tetigi ózgertiledi. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Memleket basshysy orta bilim boıynsha qashyqtan oqytý platformalarynyń múmkindigin arttyrý tapsyrmasyn bergenin bilesizder. Birkelkilendirý, ortaq talaptar qoıý boıynsha jumysty bastap kettik. Ary qaraı bul jumysty jalǵastyryp, tıisti deńgeıde oryndaıtyn bolamyz. Ustazdardyń jalaqysy boıynsha qarjy bıýdjette qarastyryldy jáne 1 qańtardan bastap beriledi dep otyrmyz. Osy jyldyń qyrkúıek aıynyń ózinde ustazdardyń dápter tekserý boıynsha ústemeaqysy 2 ese kóbeıdi. Sonymen qatar ustazdardyń synyp jetekshiligi úshin alatyn ústemeaqysy da eki ese arttyryp otyr»,- dedi mınıstr Úkimet úıinde ótken baspasóz máslıhatynda.

Onyń aıtýynsha, bıyl magıstratýra bitirgen ustazdarǵa magıstrlik deńgeıine sáıkes aıyna qosymsha 27 myń teńgeden alatyn bolady.

«Memleket basshysy aýyl, qala mektepterin damytý, ásirese jalpy bilim berýdi damytý boıynsha tapsyrma berdi. Bul tapsyrmany oryndaý úshin tıisti jumystar júrgiziletin bolady. Eń aldymen shaǵyn jınaqty mektepterge qatysty. Olarda birneshe problema bar. Birinshisi - ustazdardyń jetispeýshiligi, ekinshisi - materıaldyq-tehnıkalyq bazasy, bilim deńgeıi. Sondyqtan osy turǵyda jumys júrgizemiz. Eńbekaqy tóleý tetigin ózgertemiz. Utqyr muǵalim, ınternat salý, ádistemelik kómek, oqytý jumystary, jalpy materıaldyq-tehnıkalyq bazany jańartý boıynsha is-sharalar qabyldanady», - dedi ol.