Ashat Aımaǵambetov salynatyn «jaıly mektepterdiń» azaıyp ketkenine alańdaýshylyq bildirdi
«Almaty oblysy – qazirgi tańda úsh aýysymdy mektep eń kóp shoǵyrlanǵan óńir. Oblystyq bilim basqarmasynyń ókili otyr. Sizder osy qysqartylǵan tizimdi qoldap otyrsyzdar ma? Sonda basynda osy tizimdi durys bekitpegensizder me?» dep surady Ashat Aımaǵambetov komıtettiń otyrysynda.
Basqarma basshysy Gúlsara Isaǵulovanyń aıtýynsha, «Samruk-Kazyna Construction» akıtsonerlik qoǵamynyń tizimdi qysqartý týraly talabyna sharasyzdyqtan kelisken.
«Árıne, biz qarsymyz. Ony ózimiz usynǵan joqpyz. Bizden solaı talap etti. «Tizimdi qaıta qarap berińizder, áıtpese ózimiz kózdi jumyp otyryp qysqarta salamyz» dedi. Negizi 63 mektep kerek bolǵan. Bizde úsh aýysymmen oqıtyn 52 mektep bar. Osy tizimdi qoıa beretin bolsaq, úsh aýysymdy mektep sany 60-tan asyp ketedi. Bir ǵana Іle aýdanynda úsh aýysymdy 20 mektep bar», - dedi ákimdik ókili.
Ashat Aımaǵambetov «Jaıly mektep» jobasynyń tizimimen bulaı «oınamaý» kerektigin atap ótti.
«Qazirgi tańda eń basty problema – tizimdi qaıta qaraý. Tizim bekitildi. Ony eshkim aspannan alyp bekitken joq qoı. Ol barlyq qoǵamdyq keńester, máslıhattar, jergilikti azamattar maquldaǵannan keıin ǵana bekitilgen. Endi jańaǵy áriptesimiz aıtqandaı májbúrlep qysqartý qanshalyqty durys? Úkimet muny maquldap otyr ma degen suraq bar. Tizim bekitilip, ákimder de, bizdiń depýtattar da saılaýaldy nasıhat kezinde halyqqa jarııa etti. Halyq onyń bárin bilip otyr. Endi ákimder, depýtattar halyqqa qaı betimen túsindiredi. Úkimettiń qaýlysy oryndalmaı qaldy dep qalaı aıtamyz. Men tizimdi durys jasamaǵansyzdar ma degendi ádeıi aıtyp otyrmyn. Keıbir laýazymdy tulǵalardyń «Ol tizim durys bolmaǵan. Ondaı qajettilik joq. Sondyqtan kelisip jatyrmyz» degen aqparaty bar», - dedi Májilis depýtaty.