Memlekettik mektepterde sheteldikterdiń sabaq berýi zańdy ma - depýtat jaýaby

<p>Májilis depýtaty Ashat Aımaǵambetov «Qazaqstannyń ońtústik óńirlerinde ashylýy múmkin orys mektepterine reseılik pedagogterdi tartý týraly» usynysqa qatysty pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform. </a></p>

Áleýmettik jelide Oqý-aǵartý mınıstri Ǵanı Beısembaevtyń eldiń ońtústiginde ashylýy múmkin mektepterge reseılik pedagogterdi shaqyrý týraly aıtqan sózi tarap júr. Ádilet mınıstrliginde ótken vedomstvoaralyq komıssııa otyrysnan keıin jýrnalıster Májilis depýtaty Ashat Aımaǵambetovke osy másele týraly suraq qoıdy.

«Qazaqstannyń memlekettik mektepterinde sheteldik azamattardyń sabaq berýi zańdy ma?» — dep surady BAQ ókili.

«Bul máseleni basqasha qoıý kerek. Jalpy Qazaqstanda basqa memleketterdiń azamattary jumys isteı ala ma? Bul Eńbek kodeksiniń sheńberinde bar. Ózderińiz kórip júrsizder. Qazaqstanda basqa memleketterdiń azamattary túrli salalarda jumys istep jatyr. Eger sheteldikter bizdiń zańnamaǵa sáıkes kelse, tıisti talaptary bar, sol talaptarǵa sáıkes bolsa, onda mınıstrlik óziniń zańnamalyq-quqyqtyq aktilerinde qarastyrý kerek», — dedi ol.

Depýtat jekemenshik mektepterde sheteldik azamattardyń bilim berýi zańdy ekenin atap ótti.

«Mysaly, Nazarbaev mektepterinde Qurama Shtattardyń, Frantsııanyń qyzmetkerleri boldy, qazir de bar. Basqa da jekemenshik mektepterde jumys istep jatyr. Sondyqtan bul mınıstrlik týraly jaýap bersem, kezinde ózim basshylyq jasaǵan suraqtarǵa qystyrylǵandaı bolamyn. Mınıstrliktiń ózine júgingenińiz durys», — dedi Ashat Aımaǵambetov.