Ashat Aımaǵambetov pedagog daıarlaıtyn JOO-larda qandaı ózgeris bolatynyn aıtty

NUR-SULTAN. QazAqparat – Qazaqstanda pedagog daıarlaýmen 20-30 joǵary oqý orny aınalysady. Bul týraly QR Paramenti Senatynda ótken dóńgelek ústel otyrysynda QR Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

«Mańyzdy máselelerdiń biri kadrlardy sapaly qaıta daıarlaýmen qamtamasyz etýge baılanysty. Bul jaǵdaı jalpy kardardy daıarlaýǵa da qatysty. Ókinishke qaraı, búginde 50 ball kólemindegi shekti deńgeı jetkiliksiz, ıaǵnı tym tómen sııaqty. Sondyqtan bıyl pedagogıkalyq mamandyqtarǵa túsý úshin 50-den 60 ball deńgeıine deıin kóterý sheshimin qabyldadyq. Búginde bizde 85 joǵary oqý orny pedagog daıarlaýmen aınalysyp keledi jáne biz osy JOO-larǵa talaptardy kúsheıtý boıynsha sharalardy qabyldaýdamyz», - dep toqtaldy mınıstr.

Osy oraıda pedagog daıarlaýda oqý oryndarynyń sapasyna aıryqsha ekpin qoıylatynyn atap ótti.

«Sáıkesinshe, lıtsenzııalardy qaıtarý boıynsha jumystardy júrgizemiz. Taldaý jumystary aıasynda naqty pedagogtar daıarlaıtyn 20-30 JOO qalýy múmkin. Bizge sany emes, sapasy kerek. Keıbireýleri zańgerlerdi oqytyp júrgen ýnıversıtetter nemese basqa da mamandyqtardy daıyndap jatqan oqý oryndary. Olardyń barlyǵy pedagog daıarlaýǵa kirisip ketken. Árıne, biz osy jaǵdaıdy ózgertetin bolamyz», - dedi A. Aımaǵambetov.