Ashat Aımaǵambetov: Oqý qunyn kótermeý úshin JOO-ǵa jaǵdaı jasaý kerek

NUR-SULTAN. QazAqparat – QR Bilim jáne ǵylym mınıstrligi joǵary bilim aqysyn qymbattatpaý úshin daǵdarysqa qarsy sharalar paketin usyndy, dep habarlaıdy QazAqparat.

«Qazirgi ýaqytta BǴM men joǵary oqý oryndarynyń mindeti – bilim berý sapasynyń joǵary deńgeıin qamtamasyz etip qana qoımaı, bilim alýshylarǵa qarjylyq júktemeni azaıtý bolyp otyr. Men qazirdiń ózinde joǵary oqý oryndaryna oqý qunyn kótermeý týraly usynys jasadym, biraq bul úshin joǵary oqý oryndaryna da jaǵdaı jasaý kerek. Osyǵan baılanysty daǵdarysqa qarsy sharalar paketin usynamyz», - dep jazdy mınıstr Ashat Aımaǵambetov facebook jelisinde.

Eń aldymen, JOO-nyń aqyly negizde bir bilim alýshyǵa eń tómengi shyǵyndarynyń jáne grant qunynyń araqatynasy boıynsha talapty joıý usynyldy. Memlekettik grant mólsherin arttyrý jaǵdaıynda bul talap joǵary oqý oryndarynyń baǵa saıasatyn aqtaýǵa aınalmaýy kerek.

Oǵan qosa, daıarlaýdyń praktıkaǵa baǵyttalǵan salalary úshin ǵylymı dárejeniń mindetti bolýy men shtatta jumys isteý talaptary joıylady.

«Oqytýshylar sanynyń stýdentter sanyna qatynasy týraly talapty joıý kerek. Bilim berýdi damytýdyń jańa jaǵdaılarynda bul talap ózekti bolmaıdy. Tórtinshiden, qorytyndy baqylaý júrgizý formasy boıynsha talap kúshin joıylady. Qarjy, Býhgalterlik esep, IT, Meıramhana isi sııaqty salalarda oqý nátıjelerine qol jetkizý tezıspen emes, naqty praktıkalyq jumys daǵdylary, demonstratsııalyq emtıhandar nemese jobalar arqyly rastalady. Bul keıbir ýnıversıtetterdegi qur belgi úshin jazylǵan kýrstyq jumystarǵa da qatysty», - deıdi A. Aımaǵambetov.

Sondaı-aq, pandemııa kezeńinde oqý bitirgen soń, bir jylda jumysqa ornalasý týraly talap taldaý kezinde ǵana eskeriletin bolady.

«Odan bólek, endi biz túlekterdi jumysqa ornalastyrýdy ǵana emes, osy túlekterdiń jańa jumys oryndaryn ashýyn da eskeretin bolamyz. Altynshy usynys, JOO ıelenýi tıis materıaldyq aktıvterdiń túrleri boıynsha talaptardy qaıta qaraý kerek. Eń bastysy – aktıv túrleri emes, bilim berý sapasyn qamtamasyz etý úshin jaǵdaı jasalýy kerek», - dedi A. Aımaǵambetov.

Buǵan deıin Bilim mınıstri qashyqtan nemese aralas oqý túrin tańdaý múmkindigin engizýdi, – bilim berýge bıznes pen óndiris ókilderin, sheteldik oqytýshylardy tartýdy usynǵan edi.

Sonymen birge, doktoranttardyń dıssertatsııa taqyrybyn bekitý merzimi uzartylýy múmkin.