Ashat Aımaǵambetov mektepterdiń statıstıkasy nege shyndyqtan alshaq ekenin aıtty

<p>ASTANA. KAZINFORM &ndash; Májilistiń Halyqaralyq ister, qorǵanys jáne qaýipsizdik komıtetiniń otyrysynda depýtat Ashat Aımaǵambetov statıstıkalyq derekterdi jınaý isi qatty saıasılanyp ketkendikten shyndyqtan alshaqtap bara jatqanyn naqty mysalmen jetkizdi.</p>

«Saladaǵy basty tetiktiń biri – aqparatty jınaý tásili. Aqparatty qalaı jınap júrmiz, ony bazaǵa kim engizedi? Taǵy da meniń súıikti taqyrybyma salyp qaraıyq. Mysaly apattyq jaǵdaıdaǵy nemese úsh aýysymda oqytatyn mektepterdiń statıstıkasyn alaıyq. Ol mektepterdiń aqparatyn, ishindegi qondyrǵylardyń málimetin kim jınaıdy? Mektepterdiń ózi jınaıdy. Ne muǵalim, ne laborant otyrady da, bazaǵa kirgizedi. Oǵan tapsyrma berip qoıǵan. «Bárine sáıkestirip jaz», - degen pármen berilgen. Bilim berýdiń ulttyq derekter bazasyna sol aqparat ketedi. Ony keıin Ulttyq statıstıka bıýrosy alady. Bizdiń derekter osylaı alynady», - dedi ol.

Depýtattyń sózinshe, júıedegi bul olqylyq derekterdi burmalaýǵa jol ashyp otyr.

«Sondyqtan bul jerde derekterdi jınaý tetigin qaraý kerek. Ázirge statıstıkalyq derekter jınaý joǵary deńgeıde saıasılanyp ketken. Sáıkesinshe derekterdi burmalaý paıda bolady», - dedi Ashat Aımaǵambetov.