Ashat Aımaǵambetov «Kitapqa qushtar mektep» jobasyn iske asyrýdaǵy kemshilikterdi atady
«Kitap oqý mádenıetin qalyptasyrý, jalpy oqý saýattylyǵyn arttyrý - biz úshin úlken mindet. Osy baǵytta «Kitapqa qushtar mektep» jobasyn iske asyryp jatyrmyz. Árıne, joqqa shyǵarýǵa bolmaıdy, jaqsy ózgerister bar. Qazirgi ýaqytta kitaphanalardyń balalarǵa qajetti ádebıettermen tolyqtyrylýy durys. 400-den astam ártúrli kovorkıng ortalyqtarynyń ashylýy, kitaphanashylardyń jańa formatta jumys isteı bastaýy, oqyrmandardyń kóbeıýi qýantady. Biraq, áli de sheshilmeı jatqan másele barshylyq. Oǵan da nazarlaryńyzdy aýdartamyn. Onyń ishinde barlyq óńirde birdeı joǵary deńgeıde osy joba iske asyp jatqan joq. Ásirese, elordamyzda, Aqmola oblysynda, basqa da óńirlerde bul joba óte tómen deńgeıde iske asyrylyp jatyr», - dedi Ashat Aımaǵambetov búgin Bilim jáne ǵylym mınıstrliginiń apparat jınalysynda.
Sonyqtan mınıstr oblystardyń bilim basqarmalary, mektep dırektorlary «Kitapqa qushtar mektep» jobasyn tıisti deńgeıde uıymdastyrýy qajettigin basa aıtty.
«Kún saıyn 20 mınýt kitap oqý máselesin de bıyl arnaıy engizgenbiz. Kovorkıng formatynda jumys uıymdastyrý, kitaphanashylardyń jumysyn jańa formatta uıymdastyrý, basqa da baǵytta jumys júrgizilýi kerek. Biraq, búginde osy máselelerge tıisti deńgeıde kóńil bólinbeı jatyr. Anaý kúni bir mektepke baryp, kitaphanasyn qaradym. Kitaphanaǵa kirip kelgende balalarǵa arnalǵan kitaptar turýy kerek. Biraq, onyń ornyna balalarǵa qyzyqty emes týyndylar qoıǵan. Sonda basty baǵyttyń, mindettiń ózin eshkim túsinbegeni ǵoı. Satyp alynǵan kitaptardyń ózin qarasaq, qajet emes. Múmkin qajet te shyǵar. Biraq, osyndaı kitaptardyń qajet emes kólemin satyp alǵan. Óte kúrdeli. Áıteýir kitap satyp alý kerek dep, oıyna kelgen kitapty satyp alýdyń qajeti joq. Tıisti tizim, mektep baǵdarlamasy bar. Sol baǵdarlamaǵa saı satyp alý kerek», - dedi ol.
Osy rette Ashat Aımaǵambetov barlyq óńirlerge 2 apta ishinde mektep kitaphanalaryndaǵy ádebı kitaptarǵa taldama júrgizip, esep berýdi tapsyrdy.
«Sol eseptiń nátıjesi boıynsha tıisti shara qabyldaımyz. Qajet bolsa, oryndarynan bosatý kerek. Kitap oqyý mádenıetin, saýattylyǵyn arttyramyz dep jatsaq, keıbir áriptesterimiz muny túsinbese, onda olar ary qaraı jumysyn jalǵastyrmaýy kerek. Bul biz, Memleket basshysy aıtpaı-aq ár adamnyń, ár qyzmetshiniń kúndelikti jumysy», - dedi mınıstr.