Ashat Aımaǵambetov: Erekshe bilim berý qajettiligi bar balalardy qoldaýǵa kúsh salyp jatyrmyz

NUR-SULTAN. QazAqparat – QR Bilim jáne ǵylym mınıstri Asha Aımaǵambetov mınıstrlik tarapynan erekshe bilim berýdi qajet etetin balalardy qoldaýǵa barynsha kúsh salyp jatqanyn aıtty, dep habarlaıdy QazAqparat.

Bul týraly mınıstr búgin óziniń Facebook paraqshasynda jazdy.

«Búgin Qazaqstannyń Azamattyq forýmy qarsańynda úkimettik emes uıym ókilderimen kezdesý ótkizdim. Belsendilermen birqatar mańyzdy máseleni talqyladyq. Sondaı-aq bilim jáne ǵylym salasyna qatysty aıtylǵan bastamalardy nazarǵa aldym.

Biz Úkimettik emes uıymdarmen turaqty negizde ózara is-qımyl jasaıtynymyzdy atap ótkim keledi.

Bizdiń yntymaqtastyǵymyz mańyzdy jobalar men standartty emes sheshimderdi, ásirese balalardyń quqyqtaryn qorǵaý máselelerinde iske asyrýǵa yqpal etedi.

Biz tyǵyz jumys isteıtin ÚEU óte kóp bolǵandyqtan, bárin tizip shyǵý qıyn. Sondyqtan men erekshe bilim berý qajettilikteri bar balalardy qoldaý máseleleri boıynsha jumys isteıtinderdi atap óteıin»,-dedi Ashat Aımaǵambetov óziniń jazbasynda.

Máselen «Dara», «Bolashaq» sııaqty qorlardyń belsendi qyzmetiniń arqasynda biz mektepterde resýrstyq ortalyqtar men ınklıýzııany qoldaý kabınetterin ashtyq. Osylaısha, erekshe bilim berý qajettilikteri bar balalardy oqý protsesine beıimdeý úshin jańa jaǵdaılar jasaldy.

«Men jaqynda ǵana barǵan «Aýtızm ortalyqtaryn» qurý jónindegi «Asyl Mıras» qorynyń jobasy mınıstrlik bekitken arnaıy, bilim berý uıymdarynyń tizbesine endi jáne qazir óńirlerde ashyla bastady»,-deıdi mınıstr.

Sondaı-aq onyń jazýynsha, mınıstrlik ÚEU-men birge aýyldyq jerlerde erekshe bilim berý qajettiligi bar balalardy qoldaý boıynsha jumys júrgizip jatyr. Máselen, «Dara» qory jergilikti atqarýshy organdardyń kómegimen aýyldyq psıhologııalyq-pedagogıkalyq túzetý kabınetteriniń tutas jelisin ashty.

Erekshe bilim berý qajettilikteri bar balalardyń shyǵarmashylyq áleýetin damytýǵa úles qosatyn jyl saıynǵy «Juldyzaı» shyǵarmashylyq baıqaýy arnaıy mektep tárbıelenýshileri arasynda úlken tanymaldyqqa ıe.

«Aıala» qory arnaıy mektepterde kásiptik baǵdar kabınetterin ashyp jatyr.

Úkimettik emes uıym ókilderimen birge júzege asyrylatyn osyndaı jobalar óte kóp.

«Men búgingi jıynǵa qatysýshylardyń barlyǵyn bilim berý júıesi men ǵylymnyń damýyna barynsha qoldaý bildirip jatqan elimizdiń janashyr azamattary deý durysyraq dep oılaımyn. Osy kezdesýge qatysqanyma qýanyshtymyn jáne odan ári jemisti yntymaqtastyǵymyzǵa senemin. Mınıstrlik birlese otyryp jumys isteýge daıyn»,-delingen jazbada.