Ashat Aımaǵambetov bilim basqarmalarynyń shyndyqtan alshaq esebine keıis bildirdi

SEMEI. QazAqparat –Oqý-aǵartý mınıstri Ashat Aımaǵambetov mektep kitaphanalarynyń qory tolyqtyrylyp otyratyny týraly bilim basqarmalarynyń shyndyqqa sáıkes kelmeıtin esebine keıistik tanytty, dep habarlaıdy QazAqparat.

A.Aımaǵambetov Abaı oblysyna sapary barysynda Prırechnoe aýylyndaǵy mektepte boldy. Onda kitaphanashy kórkem ádebıetter jetkiliksiz mólsherde satyp alynatynyn jetkizgen.

«Mektep kitaphanasynyń jumysy laıyqty deńgeıde emes. Kitaphanashy kórkem ádebıetter jetkiliksiz mólsherde satyp alynatynyn aıtty.

Alaıda buǵan deıin bilim basqarmalary jyl saıyn kitap qory tolyqtyrylatyny týraly esep bergen edi. «Oqýǵa qushtar mektep» jobasy tıisti deńgeıde júzege asyrylmaı jatyr.

Oblystyń bilim basqarmasy basshylyǵyna barlyq eskertýdi joıý tapsyryldy», - dep jazdy mınıstr Facebook-te.

Atalǵan bilim ordasynda 237 bala oqıdy. Vedomstvo basshysy pedagogtermen oqý baǵdarlamalary, balalarmen jumys, baǵalaý jáne ózge de máselelerdi talqylady. Oqýshylarmen sóılesip, UBT-ǵa daıyndyq, mamandyq tańdaý, kitap oqý, debat qozǵalysy jáne mektep parlamentteri taqyryptarynda áńgimelesti.

«Oblystyń bólinýine baılanysty mektepterdiń jóndeý jumystary men materıaldyq-tehnıkalyq jabdyqtalý máseleleri sheshimin tabatynyna senemin. Oblys basshylyǵynyń barlyq túıitkildi máseleni sheshý boıynsha naqty kózqarasy bar ekeni baıqalady.

Sonymen birge Abaı oblysyndaǵy mektepter qurylysynyń daıyndyq jumystarymen tanystym. «Jaıly mektep» ulttyq jobasy aıasynda oblysta 12 myńǵa jýyq oqýshyǵa eseptelgen 11 mektep (6 mektep Semeı qalasynda jáne 5-eýi aýylda) salý josparlanyp otyr.

Qazir ákimdik bul baǵyttaǵy jumysty joǵary deńgeıde uıymdastyrdy. Bul ınjenerlik-kommýnıkatsııalyq ınfraqurylym máseleleri, bastapqy ruqsattardy bekitý jáne taǵy basqasy», - dedi A.Aımaǵambetov.

Foto: facebook.com/askhat.aimagambetov