Ashat Aımaǵambetov: Balalarǵa eń aldymen qazaq tilindegi kitaptar qoljetimdi bolýy tıis
«Bul – óte mańyzdy taqyryp. Munyń aldynda da osy tapsyrmany bergen bolatynbyz (mektep kitaphanalaryn ádebı kitaptarmen tolyqtyrý). Oqý saýattylyǵy boıynsha halyqaralyq zertteýlerdi qaraıtyn bolsaq, biraz problema bar. Ony sheshý úshin árıne biz kórkem ádebıetti balalarǵa oqytý boıynsha úlken jumys atqarýymyz kerek. Biraq qazir kitaphanalarymyz qandaı jaǵdaıda? Jalpy kitaphana qory qandaı? Kitaphanashylardyń jaǵdaıy qandaı? Osy suraqtarǵa jaýap berer bolsaq, árıne búgingi tańda birqatar másele bar. Sondyqtan osy sala úlken ózgeristerdi qajet etedi», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.
Mınıstr bul baǵytta jol kartasy bekitiletinin jetkizdi.
«Búgingi kúni qazaq tilinde oqýshylardyń 70 paıyzǵa jýyǵy bilim alýda. Al oqýshylar kitaphanaǵa kelgende birinshiden qazaq ádebıeti boıynsha tıisti kitaptar bolýy kerek. Ol qoljetimdi me? Osy máseleni sheshýimiz kerek. Ekinshiden qazaq ádebıeti birinshi bolsa, odan keıin dúnıejúzilik ádebıet qoljetimji bolýy tıis. Eń birinshi kezekte qazaq tilinde! Mysaly Aızek Azımov, Reı Bredberı sekildi álemdik klassıkterdiń qazaq tiline aýdarylǵan kitaptary bar ma? Olar bar bolǵanymen kitaptardy kitaphanalar men mektepterge alyp jatyrmyz ba degen suraqqa berer bolsaq, bul sharýa biraz eńbekti qajet etedi. Ol balalardyń kókjıegin keńeıtýimiz kerek. Balalar bir jaǵynan qazaq, ekinshi jaǵynan dúnıejúzilik ádebıetten sýsyndap, ózderi jetilýi tıis. Sol arqyly oqý saýattylyǵyn arttyra alamyz», - dedi ol.