Ashat Aımaǵambetov: Balalardyń ál-aýqaty ındeksin daıyndaý boıynsha úlken jumys atqarýdamyz

NUR-SULTAN. QazAqparat – Dúnıejúzilik balalar kúni aıasynda QR Bilim jáne ǵylym mınıstri Ashat Aımaǵambetov birneshe mektep oqýshysymen onlaın-kezdesý ótkizdi, dep habarlaıdy QazAqparat.

Onlaın-kezdesýler ıÝNISEF-tiń «Kids Take over – Balalar kósh bastaıdy» bastamasy negizinde uıymdastyryldy.

«Biz qazir balalardyń ál-aýqaty ındeksin daıyndaý boıynsha úlken jumys júrgizip jatyrmyz. Balalardyń ál-aýqaty – tek bilim berý ǵana emes, sonymen qatar densaýlyq saqtaý jáne basqa da kóptegen salanyń máselesi. Biz ındeks jasap, ár qala, ár aýdan, ár oblys boıynsha qandaı da bir oblystyń qalaı jumys isteıtinin jáne balalarǵa qandaı jaǵdaı jasaıtynyn, bala quqyqtaryn qalaı qorǵaıtynyn kórgimiz keledi. Bul jumysty bastap ta kettik, kelesi jyldyń qańtar aıynan bastap jumys júıeli túrde júrgiziletin bolady dep oılaımyn. Sondaı-aq, biz ár mektepte ózin-ózi basqarý ınstıtýttary – mektep parlamentteri bolǵanyn qalaımyz», – dedi Bilim jáne ǵylym mınıstri Ashat Aımaǵambetov.

Efır barysynda oqýshylar tarapynan usynystar men bastamalar aıtyldy. Atap aıtqanda, oqýshylar bala quqyqtaryn qorǵaý maqsatynda senim telefondaryn uıymdastyrýdy usynady, sondaı-aq mektepterdi kórkem ádebıettermen qamtamasyz etý máselelerin kóterdi. «Biz «Oqıtyn ult» degen úlken jobany bastadyq. Ár mektepti kórkem ádebıetpen, ásirese qazaq tilindegi ádebıettermen qamtamasyz etkimiz keledi. Kitaphanalardy kórkem ádebıetpen qamtamasyz etý kerek. Balalarymyzdyń kitap oqýy biz úshin óte mańyzdy», – dedi Bilim mınıstri qashanda oqýshylardy tyńdaýǵa jáne qoldaýǵa daıyn ekenin aıta kele.

Esterińizge sala keteıik, Qazaqstanda «Oqıtyn mektep – oqıtyn ult» jobasy bastaldy.