Ashat Aımaǵambetov: Áıel-balasyn sabaıtyndar úıde jatady, zábir kórgender dalada qashyp júredi

ASTANA. QazAqparat – Іshki ister vıtse-mınıstri Igor Lepeha otbasyna turmystyq zombylyq jasaýshylardy úıden ýaqytsha qýatyn normanyń kemshiligin atady, dep habarlaıdy QazAqparat tilshisi.

«Ákimshilik quqyq buzý týraly kodekstiń 54-baby bar. Biraq ol bapta sottyń turmystyq zorlyq-zombylyq jasaǵan adamdy basqa baspanasy bolǵan jaǵdaıda ǵana zardap shegýshi turyp jatqan úıden ýaqytsha qýa alatyny aıtylǵan. Mundaı qosymsha atalǵan baptyń kúshin tolyqtaı dármensiz etip tur. Áýel basta osy normany engizer kezde turmystyq zombylyq kórsetýshiniń áreketinen zardap shegýshiniń densaýlyǵyna aýyr jaraqat tússe, kúsh kórsetýshisi tártibin túzemese, sot sheshimi shyqqansha úıden qýyla turýy kerek dep qosqanbyz. Qazirgi tańda joǵaryda aıtqan túzetýge baılanysty úıden ýaqytsha qýý babyn birneshe adamǵa ǵana qoldana aldyq», - dedi Igor Lepeha Májiliste ótken taqylaýda.

Májilistiń Áleýmettik-mádenı damý komıtetiniń tóraǵasy Ashat Aımaǵambetov bul normanyń pármenin kúsheıtý úshin ǵylymı negizdemesin pysyqtaý qajettigin aıtty.

«Jalpy qazirgi jaǵdaı osylaı. Kúsh kórsetýshi úıde qalyp, zardap shekkender úıden qýylady. Zombylyqtan qashyp jas balasymen úıden ketýge májbúr. Sonda áıel-balasyn sabaıtyndar úıde jatady, zábir kórgender nege bosyp júrýi kerek? Sondyqtan normany qaıta qaraýdyń máni bar shyǵar. Bul jerde aıtqan usynystaryńyzdyń bári ǵylymı negizdelgen bolýy kerek. Óıtkeni ár normany qoldaný tájirıbesi árkelki», - dedi Ashat Aımaǵambetov.