Ashat Aımaǵambetov aýyl mektebiniń sońǵy qońyraý saltanatyna qatysyp, túlekterdi quttyqtady

KÓKShETAÝ. QazAqparat - QR Bilim jáne ǵylym mınıstri Ashat Aımaǵambetov Tselınograd aýdanynyń Talapker aýylynyń jalpy orta bilim beretin mektebiniń sońǵy qońyraý saltanatty jıynyna qatysty, dep habarlaıdy QazAqparat tilshisi.

Aqmola oblystyq bilim basqarmasynyń málimetinshe, Talapker orta mektebi 2012 jyly paıdalanýǵa berilgen. Mektep 900 oryndyq, qazirgi kezde onda 1865 oqýshy bilim alyp jatyr.

Talapkerlik mektep oqýshylary ár túrli respýblıkalyq, oblystyq saıystarǵa qatysyp, júldeli oryndarǵa ıe bolýda.

Bıyl mektepti 75 túlek bitirgeli otyr, al taǵy 123 – 9 synyptyń oqýshylary. Onyń ishinde 4 «Altyn belgi», 6 úzdik attestatqa úmitkerler bar.

«Mine, oqý jyly de óz máresine jetti. Bul oqý jyly barlyq oqýshylar men stýdentter úshin ońaı bolǵan joq. Dúnıe júziniń bilim salasy pandemııa degen synaqtan ótti» – dedi Ashat Qanatuly. – Bilim jáne ǵylym mınıstri retinde taǵy aıtqym keledi, eń myqty úzdik oqýshylarǵa, eń myqty úzdik túlekterge «muǵalim» mamandyǵyn tańdaýǵa shaqyramyn. Óıtkeni bolashaqtyń kilti ustazdardyń qolynda. Elimizdi damyǵan elderdiń ishine qosamyz desek, onda bizge myqty muǵalimder kerek. Ol úshin myqty, úzdik oqýshylar «muǵalim» mamandyǵyn tańdaý kerek. Ol úshin biz tıisti jaǵdaı jasap jatyrmyz. Memleket basshysynyń qoldaýymen ustazdardyń jalaqysy ósip jatyr. Ony taǵy eki ese ósiremiz. Tıisti qoldaý jasap, ári qaraı tıisti jaǵdaıdy jalǵastyramyz. Muǵalimge oqyp júrgen stýdentterdiń stıpendııasy eń joǵary, sondyqtan eń myqty túlekter muǵalim maamandyǵyn tańdaıdy dep úmittenemin».

Mınıstr túlekterden kóńil-kúıin surap bildi.

Sondaı-aq, mektep bitirýshiler aldynda óziniń ómirlik tájirıbesin bólisip, qıyndyq pen qatelik jasaýdan qoryqpaý kerektigin aıtty.

Ata-analar keńesiniń mańyzyn da atap ótti.