Ashat Aımaǵambetov Aqtóbe oblysy bilim salasynyń jaı-kúıimen tanysty

AQTÓBE. QazAqparat - Bilim jáne ǵylym mınıstri Ashat Aımaǵambetov Aqtóbe oblysyna jumys saparymen kelip, mektepterdi aralady, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Jumys sapary kezinde mınıstr óńirdegi «Aýyl – el besigi» arnaıy jobasynyń júzege asyrylýymen tanysady.

Mınıstr Ashat Aımaǵambetov pen oblys ákimi Ońdasyn Orazalınniń jumys sapary 2020 jyly ashylǵan Aqbobek halyqaralyq jeke mektebinen bastaldy. Qazirgi tańda munda 500-deı bala bilim alyp, alpysqa jýyq muǵalim eńbek etedi. Olardyń qatarynda «Bolashaq» baǵdarlamasynyń túlekteri de bar.

Ustazdar qaýymymen tildesken Ashat Aımaǵambetov mekteptiń kitaphana qoryn álem ádebıetiniń qazaq tilindegi týyndylarymen tolyqtyrýdy, únemi muǵalimderdiń biliktiligin arttyrýdy usyndy.
Keıin № 51 mektepke baryp, mınıstr oqý protsesimen tanysty, qalanyń muǵalimderimen kezdesip, olarmen ózekti suraqtardy talqylady.

Kezdesý barysynda bilim salasyndaǵy jetistikter men ınnovatsııalarǵa, muǵalimderdiń biliktiligin kóterýge, mektepterdegi qaýipsizdikti qamtamasyz etýge jáne t.b. qatysty taqyryptar qozǵaldy. Budan ózge, arnaıy orta bilimdi damytý týraly aıtyldy.

«Bıyl «Jas maman» jobasy aıasynda óńirdegi jeti kolledj modernızatsııalanyp jatyr. Sondaı-aq, keler jyldan-aq kolledjderde neǵurlym suranysqa ıe mamandyqtar boıynsha jańa mamandyqtardy ashyp, «qajet emes» mamandyqtardy jabý úshin eńbek naryǵy jaqsylap saraptalýda. Qazir mynadaı jaǵdaı: iri óndiris kásiporyndarda eńbekaqysy men áleýmettik paketi jaqsy 500-ge jýyq bos jumys orny bar. Jumysqa ornalasqysy keletinder bar, biraq tıisti bilimi men biliktiligi joq. Osynyń ornyn toltyrýymyz kerek»,- dedi oblys ákimi Ońdasyn Orazalın.

Mınıstr Aqtóbe oblysy bilim salasyn qarjylandyrýda, memlekettik-jeke seriktestik qaǵıdasyndaǵy mektepter salýda, ustazdar men oqýshylardy qoldaýda kóshbasshy óńirlerdiń biri ekenin atap ótti.