Asharshylyq jaıly ashylmaǵan aqıqat, jazylmaǵan jaıttar áli de az emes - Máýlen Áshimbaev
Senat spıkeri Máýlen Áshimbaevtyń aıtýynsha, shara Saıası qýǵyn-súrgin jáne asharshylyq qurbandaryn eske alý kúni qarsańynda arnaıy uıymdastyrylyp otyr.
«Úsh tomdyq kitapta zobalań jyldarǵa qatysty tyń derekter men tarıhı qujattar jınaqtalǵan. Olar asharshylyqtyń alǵysharttary jáne tragedııalyq saldary týraly málimetterdi qamtıdy. Barlyq qujattar elimizdiń ortalyq jáne óńirlik arhıvterinen alyndy. Basqa memleketterdiń arhıvterinde saqtalǵan derekter de jınaqqa engizildi. Sonyń nátıjesinde buryn qolǵa túsirý qıyn bolyp kelgen jáne buǵan deıin jarııalanbaǵan birqatar málimetter kópshilik úshin qoljetimdi bolyp otyr. Jańa týyndy ýnıversıtetterge, ǵylymı zertteý ınstıtýttaryna jáne ortalyq, óńirlik kitaphanalarǵa jiberiledi. Jalpy, asharshylyqtyń zardaby ultymyz úshin óte aýyr bolǵany belgili. Bul baǵytta ashylmaǵan aqıqattar men jazylmaǵan jaıttar áli de az emes. Sondyqtan Prezıdentimiz osy taqyrypty zertteý týraly naqty tapsyrma bergen edi. Sonyń aıasynda Senat aqpan aıynda aýqymdy dóńgelek ústel ótkizdi. Búgin tanystyrylǵan eńbekti sol is-sharanyń nátıjesi jáne Senattyń asharshylyqty zertteýge qosqan naqty úlesi dep aıtýǵa bolady» dep jazady Máýlen Áshimbaev Facebook paraqshasynda.
Senat tóraǵasy osy rette bar bolǵany úsh-aq aıdyń ishinde myńnan astam arhıv qujattaryn jınap, qundy dúnıe daıyndaǵan avtorlardyń eńbegin erekshe atap ótti.
«Eldik múdde jolynda aıanbaı jumys istegen Berik Ábdiǵalıuly bastaǵan ujymǵa, redaktsııa alqasyna jáne qoldaý kórsetken barsha azamattarǵa rızashylyǵymyzdy bildiremiz. Árıne, bul iste bir kitappen shektelip qalýǵa bolmaıtyny túsinikti. Qujattar men derekterdi ári qaraı da jınaqtaý qajet. Sonymen birge jarııalanǵan málimetterdiń negizinde jan-jaqty ǵylymı zertteý júrgizý de - mańyzdy maqsattardyń biri. Ol úshin memlekettik organdar tarapynan tıisti qoldaý kórsetile beredi. Sondyqtan aldaǵy ýaqytta bul salada keshendi jáne júıeli jumystar jalǵasady dep senemiz. Kópshilikke jol tartqan jańa eńbektiń tarıhymyzdyń aqtańdaq betterin ashýǵa, táýelsizdigimizdi nyǵaıtýǵa jáne ult sanasyn jańǵyrtýǵa qosar úlesi mol bolsyn!» deıdi Máýlen Áshimbaev.
Eske sala keteıik, búgin Senatta Saıası qýǵyn-súrgin jáne asharshylyq qurbandaryn eske alý kúni qarsańynda «Asharshylyq. Golod. 1928-1934. Derekti hronıka» úsh tomdyq jınaǵy tanystyryldy.
Jıynda sóz alǵan Senat tóraǵasy Máýlen Áshimbaev Táýelsizdiktiń 30 jyldyǵy aıasynda osyndaı is-sharalardyń mańyzy zor ekenin aıtty.
«Táýelsizdigimizdi ulyqtaý sátinde toıǵa emes, oıǵa basymdyq berý, ótkenimizden ónege alý – bizder úshin zor mindet. Memleket basshysy 30 jyldyqty atap ótýge arnalǵan alǵashqy otyrysta osy máselege basa mán berdi. Prezıdentimiz aıtqandaı, egemendiktiń búgingi belesi eldiń jańa kelbeti men ulttyń jańa bolmysyn qalyptastyrýǵa qyzmet etýi kerek. Bul rette, tarıhı sanany jańǵyrtatyn jáne bostandyqtyń qadir-qasıetin arttyratyn is-sharalar asa mańyzdy», – dedi Máýlen Áshimbaev.