Ashanalardyń ashylýy: Infektsıonıst mamannan keńes

NUR-SULTAN. QazAqparat – Qazaqstannyń jetekshi ınfektsıonıst dárigeri, medıtsına ǵylymdarynyń doktory Dınagúl Baesheva 18 mamyrdan qoǵamdyq tamaqtaný oryndaryna barǵysy keletin azamattarǵa keńes berdi, dep habarlaıdy QazAqparat tilshisi.

«Qazir Qazaqstanda tótenshe jaǵdaı rejımi aıaqtalǵannan keıin adamdardyń bári de qýanyp, jumysqa shyqqandaryna táýbe aıtyp, shattanyp jatyr. Keıbiriniń «jumys kúnin – merekeden kem kútken joqpyz» degenin de estip qaldyq. Álbette olar endi 18 mamyrdan bastap ashylatyn dámhanalarda bas qosady. Alaıda biz bul rette qaýipsizdik erejelerin saqtaýymyz kerek. Barynsha ózińiz jaqsy biletin, vırýs juqtyrmaǵanyna senimdi azamattarmen kezdesken abzal. Ár adam koronavırýs boıynsha óz statýsyn bilýi tıis», - dedi Dınagúl Baesheva Densaýlyq saqtaý mınıstrliginiń Facebook-tegi parashasynda bergen onlaın suhbatynda.

Mamannyń aıtýynsha, qazir adamdardyń aldynda naqty ózindik sheshim tur: azamat aýyrǵysy kele me – beı-jaı júre bersin, saqtanǵysy kele me – qaýipsizdik erejelerin saqtaý kerek.

«Qazirge deıin bizdiń elimizde klınıkaly hattamanyń jeteýi qabyldandy. Nelikten hattama jıi ózgere beredi? Qazaqstanda ǵana emes, búkil elde osylaı. Sebebi biz bul ınfektsııamen birinshi ret betpe-bet kelip otyrmyz», - dedi ol.

Eske sala ketsek, keshe QR Úkimetiniń sheshimimen 2020 jylǵy 18 mamyrdan bastap qonaq úıler men ashanalardyń jumys isteýine ruqsat beriletini habarlanǵan edi.