«Asfalt topyraq ústine tóselýde»: Atyraýda ákimdik jol qurylysyna túsinik berdi
Budan buryn áleýmettik jelide Qurmanǵazy aýdanynyń Aqkól aýylynda salynyp jatqan jaıaý júrginshiler jolyna qatysty vıdeo taraǵan edi. Onda vıdeo avtory jumsaq topyraqtyń ústine asfalt tóselip jatqanyn aıtyp, kórsetedi.
Osyǵan baılanysty Qurmanǵazy aýdanynyń ákimdigi túsinik berdi.
«2018 jyly Qurmanǵazy aýdanynyń Aqkól aýylynda jaıaý júrginshi joldary bar aýylishilik joldy rekonstrýktsııalaý jumystaryna joba jasaqtalyp, memlekettik saraptamanyń oń qorytyndysy alyndy. Qurylys jumystary 2019 jyly bastaldy. 2020 jyly qarajat bólinbeýine baılanysty qurylys jumystary toqtap turdy. Qazirgi tańda qarajat bólinip, jumystar jalǵasýda. Merdiger mekeme – «BeketSátJol» JShS, tapsyrys berýshi – Qurmanǵazy aýdandyq turǵyn úı-kommýnaldyq sharýashylyǵy, jolaýshylar kóligi, avtomobıl jáne turǵyn úı ınspektsııasy bólimi.
Joba boıynsha qarastyrylǵan 8 shaqyrym jaıaý júrginshiler jolynyń qazirgi tańda 3,3 shaqyrymy tóselgen. Jobaǵa sáıkes, jaıaý júrginshiler joly qurylysyna 15 sm qum qıyrshyq tas qospasy (PGS), 4 sm asfalt salynýy qajet. Qurylys jumystary tolyqtaı jobaǵa sáıkes jasalýda. Qazirgi ýaqytta aýa raıynyń qolaıly bolýyna (+6,+8) baılanysty qurylys jumystary jalǵasyp jatyr. Jumys óndirisinde qoldanylatyn materıal sapasy men aýa raıy jaǵdaıynda paıdalaný múmkindigin rastaıtyn tıisti sertıfıkattar men jol zerthanasynyń qorytyndylary bar», - delingen Qurmanǵazy aýdanynyń ákimdigi taratqan aqparatta.
Ákimdiktiń aqparatyna qaraǵanda, jol qurylysy tapsyrylǵannan keıin merdiger mekeme onyń sapasyna qatysty 24 aıǵa kepildik beredi. Aýdan ákimdigi bul jumystardy turaqty túrde baqylaýda ustap otyr.