Áset Isekeshev pen Jeńis Qasymbek elorda áýejaıynda keńes ótkizdi

ASTANA. QazAqparat - Astana bıligi qalalyq kólik júıesiniń jumysyna qatysty jumys tobynyń kezekti otyrysyn ótkizdi. Búginde «Astana LRT» kompanııasynda qarjylyq jáne tehnıkalyq aýdıt júrgizilýde. Onyń nátıjesi boıynsha iske asyrylyp jatqan barlyq jobalarǵa baǵa beriletin bolady, dep habarlaıdy QazAqparat ákimdiktiń medıa ortalyǵyna silteme jasap.

Senbi kúni quramyna qala ákimi Áset Isekeshev, Investıtsııalar jáne damý mınıstri Jeńis Qasymbek, Qazaqstan temir joly kompanııasynyń prezıdenti Qanat Alpysbaev enetin kólik jáne turaq oryndary boıynsha jumys toby «Nursultan Nazarbaev» halyqaralyq áýejaıy men «Nurly jol» temirjol vokzalynda boldy.

Jumys tobynyń músheleri búgingi kúni áleýmettik jelilerde qyzý talqylanyp jatqan túıitkildi máselelerdi kóterdi.

Nysandardy aralap kórý barysynda Astana ákimi Áset Isekeshev temirjol vokzaldary men áýejaı mańyndaǵy turaq oryndaryna qatysty túsinik berdi.

«Turaqtar aınalasynda qalyptasqan ahýalǵa qatysty aıtar bolsam, bir aı buryn kompanııanyń top-menedjerleri tolyǵymen aýystyryldy jáne osy kúni «Astana LRT»-da qarjylyq jáne tehnıkalyq aýdıtter júrgizilýde. Olardyń nátıjesi boıynsha barlyq jobalarǵa baǵa beriletin bolady. Sondaı-aq halyqaralyq áýejaıdaǵy, jańa jáne eski temirjol vokzaldaryndaǵy turaq keńistikteriniń tarıfy boıynsha usynystar jasalady», - dedi Isekeshev.

Bul rette, shahar basshysy qalalyq jolaýshylar kóligi basqarmasy men «Astana LRT» kompanııasynyń osy máselege qatysty «aqparattyq sátsizdigin» moıyndady. Ol qysqamerzimdi turaqtyń alternatıvasy - beınebaqylaý men kúzeti bar táýligine 2 myń teńgelik jabyq parkıngtiń jáne tegin parkıngtiń baryn eske saldy.

Isekeshevtiń aıtýynsha, EKSPO ótetin ýaqytta elorda áýejaıynda engizilgen qatań tarıftik setka tabys tabý maqsatyn kózdemeıdi. Bul, turaqtarǵa zańsyz tasymaldaýshylardyń kirýin shekteýge jáne halyqaralyq kórme ótkiziletin ýaqytta áýejaı men vokzaldar mańynda beı-bereketsizdikti týdyrmaý úshin jasalyp otyr.