Áset Isekeshev paramen ustalǵan antıkor qyzmetkeri týraly pikir bildirdi

NUR-SULTAN. QazAqparat – Sybaılas jemqorlyqqa qarsy is qımyl agenttiginiń alqa májilisinde Prezıdenttiń Kómekshisi – QR Qaýipsizdik keńesiniń hatshysy Áset Isekeshev Atyraý oblysynda iri paramen ustalǵan antıkor qyzmetkeri týraly pikir bildirdi, dep habarlaıdy QazAqparat.

«Óz qatarlaryńyzdyń tazalyǵy da ózekti másele. Jýyqta Atyraý oblysynda jedel qyzmetkerdiń asa iri kólemde para alý ústinde ustalýy osy baǵyttaǵy jumystardy kúsheıtý kerektigin kórsetedi. Mundaı faktiler qoǵam arasynda jaǵymsyz talqylaýlar týyndatady. Sondyqtan jeke quram arasynda sýventıvti jumystardy kúsheıtý kerek. Agenttik jumysynyń negizgi nátıjesi qoǵam men bıznestiń, ınvestordyń eldegi sybaılas jemqorlyqtyń tómendegenin shynymen sezingeni bolýy kerek», - dedi Áset Isekeshev.

Sondaı-aq, ol memlekettik organdardyń turǵyndarmen jumysy halyqqa qyzmet kórsetý ortalyqtarynyń modeline negizdelý kerek degen oı aıtty.

«Agenttik memlekettik qyzmetshilerdiń bıznespen, halyqpen qatynasatyn barlyq perımetrinde halyqqa qyzmet kórsetý ortalyǵyndaǵy sııaqty júıege kóshýine qol jetkizý kerek. Tikeleı ara-qatynastyń bolmaýy, naqty algorıtmder, jedeldetilgen ári ashyq protsedýralar, shaǵymdanýdyń tıimdi tetigi bolǵany mańyzdy. Birinshi kezekte memlekettik jáne kvazımemlekettik sektorlardaǵy satyp alýlar salasynda tártip ornatý kerek. Bul máselelerdi iske asyrýda ashyqtyq, móldirlik, tsıfrlandyrý tásilderin paıdalaný mańyzdy. Sonymen birge jetekshi quqyqtyq tehnologııalar, jedel jumystyń jańa tásili qoldanysqa enýi qajet», - dedi Qaýpisizdik keńesiniń hatshysy.