Áset Isekeshev: Dárigerler men polıtsııanyń, áskerı qyzmetshiniń jumysyna janashyrlyqpen qarańyzdar
«Keshe Memlekettik komıssııa tótenshe jaǵdaılardyń aldyn alýdy qamtamasyz etý maqsatynda úshinshi otyrysyn ótkizdi. Úkimet, ákimder, Prezıdent apparaty, Qaýipsizdik Keńesiniń apparaty biryńǵaı shtab retinde táýlik boıy jumys isteýde. Monıtorıng, taldaý, karantın, tamaq, dári-dármektermen jáne jeke qorǵanys quraldarymen qamtamasyz etý, jolaýshylardy tasymaldaýdyń jańa jaǵdaılarda jumys isteýi, basqa da máseleler boıynsha jedel sheshim qabyldaý suraqtary nazarda. Bizdiń azamattarymyzdyń shetelden oralýy erekshe baqylaýda», - dep jazdy Áset Isekeshev Facebook -tegi paraqshasynda.
Qaýipsizdik Keńesiniń hatshysy 2020 jyldyń 22 naýryzynda saǵat 00.00-den bastap karantınniń engizilýine baılanysty Nur-Sultan jáne Almaty qalalarynyń barlyq beketterinde poıyz júrisi toqtatylatynyn málim etti. Bul tranzıttik poıyzdarǵa da qatysty. Trafıkti qalpyna keltirý týraly keıinirek habarlanady. Ázirge reısi toqtatylǵan poıyz bıletteriniń ıeleri aqshalaryn tolyq qaıtara ala alady.
«Maskalarǵa keletin bolsaq: Qazaqstanda 48 maska óndirýshi bar. Bir ǵana 17 naýryzda jalpy 300 myńnan astam maska shyǵaryldy. Olardyń qoımalarynda qazir 760 myń maska bar. Saýda núktelerinde jetkizý úzdiksiz júzege asyrylady. Eksportqa tyıym salynǵan. Bir sózben aıtqanda, maska jetýi úshin barlyq sharalar qoldanylýda. Eger siz maskalar nemese antıseptıkterdi qymbat baǵaǵa satý týraly aqparatqa tap bolsańyz, + 7-7172-70-84-78 jáne + 7-7172-31-61-45 nómirlerine habarlasyńyz. Bul Qarjylyq baqylaý komıtetiniń senim telefony», - dep jazady ol.
Áset Isekeshev áleýmettik jelilerdegi karantındi talqylaýdy muqııat qadaǵalaýda ekenin jetkizdi. Barlyq máseleler boıynsha dereý tıisti oryndar (Ákimdikter, Іshki ister mınıstrligi, Densaýlyq saqtaý mınıstrligi jáne basqalar) aqparat beredi.
«Sóz sońynda aıtarym, dárigerlerdiń, polıtsııanyń, áskerı jáne basqa da qyzmetkerlerdiń jumysyna janashyrlyqpen qarańyzdar. Jaǵdaı kúrdeli, birinshi ret karantın engizildi, barlyǵy halyqtyń qaýipsizdigi úshin jasaldy! Ótinish - jalǵan sózder men qaýesetterge senbeńizder, karantın rejimin saqtańyzdar. Kópshilik ortada kem degende eki metr qashyqtyqty ustańyz. Qolyńyzdy jıi jýyńyz. Eger qajet bolmasa, úıden shyqpaǵan durys. Tumaý belgileri bolsa dereý dárigerge habarlańyzdar jáne olardyń nusqaýlaryn naqty oryndaǵan jón. Vırýstyń taralýyn toqtatý bizdiń óz qolymyzda. Saqtanyp júreıik. Abaı bolyńyzdar», - dep jazdy Áset Isekeshev.