Áset Erǵalıev: Óńdelgen taýarlar eksporty ósti

NUR-SULTAN. QazAqparat – Óńdelgen taýarlar eksporty 25 paıyzǵa ósti. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Aǵymdaǵy jylǵy qańtar-maýsymda syrtqy saýda taýar aınalymy 45,3 mlrd AQSh dollaryn qurap, onyń ishinde eksport boıynsha kórsetkish 27 mlrd AQSh dollaryna jetti. Bul rette, óńdelgen taýarlar eksporty 25 paıyzǵa 8,9 mlrd AQSh dollaryna deıin ósti. Taýarlar ımporty 18,3 mlrd AQSh dollaryn qurady. Jalpy, saýda balansy 8,7 mlrd AQSh dollaryn qurap, oń deńgeıinde saqtaldy», - dedi Á. Erǵalıev.

Onyń aıtýynsha, óńdeý ónerkásibi turaqty ósý úrdisin saqtap otyr. Óndiris kólemi 5,9%-ǵa ósti. 14 óńir oń ósimdi kórsetti. Eń joǵarǵy ósý Almaty qalasynda, Almaty jáne Qostanaı oblystarynda baıqalyp otyr.

«Óńdeý ónerkásibi salalary boıynsha farmatsevtıkalyq ónim óndirý 39%, mashına jasaý – 22,7%, onyń ishinde avtomobıl jasaý – 34,7%, vagondar men lokomotıvter óndirisi – 37,7%, qurylys materıaldary – 13,2%, plastmassa buıymdary – 24,7%, daıyn metall buıymdary – 20,4% serpindi ósýdi kórsetip otyr», - dedi mınıstr.

Budan buryn habarlanǵandaı, osy jyldyń qańtar-shilde aılarynda Qazaqstan ekonomıkasynyń ósý qarqyny 2,7 paıyzdy qurady.