Ásem Rahmetova SQO-dan saılanǵan Senat depýtaty retinde tirkeldi

ASTANA. QazAqparat – Parlament Senatyna Soltústik Qazaqstan oblysynan saılanǵan Ásem Rahmetovaǵa depýtat kýáligi men tósbelgisi tabystaldy, dep habarlaıdy QazAqparat Ortalyq saılaý komıssııasynyń resmı saıtyna silteme jasap.

Búgin Nurlan Ábdirovtiń tóraǵalyǵymen Ortalyq saılaý komıssııasynyń «Soltústik Qazaqstan oblysynan Qazaqstan Respýblıkasy Parlamenti Senatynyń shyǵyp qalǵan depýtatynyń ornyna 2023 jylǵy 2 maýsymda saılanǵan depýtatty tirkeý týraly» qaýlysyn qabyldaý boıynsha otyrysy ótti.

«Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq Zańynyń 12, 45, 46 jáne 82-baptaryna sáıkes, Soltústik Qazaqstan oblysynan Qazaqstan Respýblıkasy Parlamenti Senatynyń shyǵyp qalǵan depýtatynyń ornyna saılaý jónindegi daýystardy sanaý nátıjeleri týraly Soltústik Qazaqstan oblystyq saılaý komıssııasy hattamasynyń jáne «Soltústik Qazaqstan oblysynan Qazaqstan Respýblıkasy Parlamenti Senatynyń shyǵyp qalǵan depýtatynyń ornyna 2023 jylǵy 2 maýsymda bolǵan saılaýdyń qorytyndylaryn anyqtaý jáne jarııalaý týraly» Qazaqstan Respýblıkasy Ortalyq saılaý komıssııasynyń 2023 jylǵy 6 maýsymdaǵy № 74/770 qaýlysynyń negizinde Qazaqstan Respýblıkasynyń Ortalyq saılaý komıssııasy Ásem Qalashbaıqyzy Rahmetovany QR Parlamenti Senatynyń depýtaty retinde tirkeýge qaýly etti.

Sondaı-aq, osy kúni Ortalyq saılaý komıssııasynyń tóraǵasy Nurlan Ábdirov Á.Q. Rahmetovaǵa Parlament depýtatynyń kýáligi men tósbelgisin tabys etti jáne depýtattyq korpýs quramynda tabys ári jemisti jumys tiledi.

Buǵan deıin habarlaǵanymyzdaı, Soltústik Qazaqstan oblysynda kenetten qaıtys bolǵan Gúlmıra Kárimovanyń ornyna Senat depýtaty saılandy.