«Asarlatyp úı salý» jobasy: 4 otbasy baspanaly boldy

TARAZ. QazAqparat – Jambyl oblysyndaǵy «Asarlatyp úı salý» jobasy aıasynda Birlesý-Eńbek, Asa, Qumtıyn, Besaǵash aýyldarynda tórt otbasy jańa úılerge qonystandy, dep habarlaıdy QazAqparat tilshisi.

Atap aıtsaq, Jambyl aýdany Asa aýylyndaǵy Marjan Jaıshybekovanyń otbasyna jańa 7 bólmeli úıdiń kilti tabystaldy. Tórt bala tárbıelep otyrǵan ana qýanyshtan kóz jasyna erik berdi. Ol janashyr jerlesterine alǵys aıtyp, árbir úıde mereke bola berýin tiledi.

Birlesý-Eńbek aýylynda turatyn Dáýren Seıdildaevtyń da úıi eskirip, tozyǵy jetken bolatyn. Ony jóndeýine múmkindigi bolmaǵan. Osyǵan alańdaýshylyq tanytqan aýyl turǵyndary jergilikti ákimdiktiń qoldaýymen úı salyp berdi. Asarlatyp salynǵan bes bólmeli jańa úı birneshe aıdyń ishinde-aq boı kóterip úlgergen. Sondaı-aq, janashyr adamdar qajetti jıhaz ben azyq-túlik satyp alyp berýge qol ushyn sozǵan. Dáýren jubaıy Zýrahan ekeýi 5 bala tárbıelep otyr.

«Osy jobanyń arqasynda umytylyp bara jatqan dástúrimiz qaıta jańǵyrýda», - dedi aýdan ákiminiń orynbasary Erlan Qydyraluly.

Al, Besaǵash aýylynda jańa úıdiń kilti kóp balaly ana Patıma Momýovaǵa tabystaldy.

«Búgin meniń kópten kútken armanym oryndaldy. Endi bizdiń óz baspanamyz bar. Buǵan úles qosqan barshańyzǵa úlken alǵysymdy bildiremin», - dedi kópbalaly ana.

Qumtıyn aýylynyń turǵyny Talǵat Syrǵabaev ta baspanaly boldy. Endi onyń otbasy 6 bólmeli úıde turatyn bolady.

Aıta keteıik, «Asarlatyp úı salý» jobasy oblys ákimi Berdibek Saparbaevtyń bastamasymen júzege asyrylýda. Onyń aıasynda aýyldastary birlesip muqtaj jáne kópbalaly otbasylarǵa, múgedekterge asarlatyp úı salyp berýde. Muqtaj otbasylar jergilikti aqsaqaldar keńesimen anyqtalady. Bıylǵy jyly «Asar» bastamasy aıasynda oblys boıynsha 117 úı boı kóterý josparlanǵan.